"އޮޕަރޭޝަން އަލިމަގު" ގެ ނަމުގައި މަސްތުވާތަކެއްޗާ ދެކޮޅަށް ކުރިއަށްގެންދާ ހާއްސަ އޮޕަރޭޝަނެއް ފުލުހުން މިއަދު ފަށައިފި އެވެ.
ފުލުހުންގެ އިންޓެލިޖެންސް މައުލޫމާތަށް ބިނާކޮށް މުޅި ރާއްޖެ ހިމެނޭ ގޮތަށް މި އޮޕަރޭޝަން ފަށާފައިވަނީ މިއަދު ހެނދުނު 05:30 ގަ އެވެ. 500 އަށް ވުރެ ގިނަ ފުލުހުން ބައިވެރިވެ ސްޕެޝަލައިޒްޑް ޑިޕާޓްމަންޓުތަކާއި ރީޖަންތަކުން ވިލަރެސްކުރެވިގެން އެކުލަވާލެވިފައިވާ ޓީމުތަކުން ވަނީ މުޅި ރާއްޖޭގެ 100 އަށް ވުރެ ގިނަ ތަންތަން އެއްވަގުތެއްގައި ބަލައި ފާސްކޮށް ތަންފީޒުކުރަން ފަށާފަ އެވެ.
ފުލުހުން ބުނީ މި އޮޕަރޭޝަނަކީ ފަހުގެ އަހަރުތަކުގައި އެންމެ ފުޅާ ދާއިރާއެއްގައި ހިންގޭ މަސްތުވާތަކެއްޗާ ދެކޮޅު ހަރަތާކް ކަމަށެވެ. އެއީ ރާއްޖޭގައި ހަރަކާތްތެރިވާ މަސްތުވާތަކެތީގެ ވިޔަފާރިކޮށް ޓްރެފިކްކުރާ ވިއުގަތައް ހުއްޓުވައި މުޅިން ނައްތާލުމަށާއި މުޖުތަމައުގައި މަސްތުވާތަކެތި ފެތުރުމުގައި ޒިންމާވާ ފަރާތްތައް ގާނޫނުގެ ކުރިމައްޗަށް ގެނައުމަށް ކުރެވޭ ދެމެހެއްޓެނިވި މަސައްކަތްތަކުގެ ތެރެއިން ހިންގޭ އޮޕަރޭޝަނެއް ކަމަށް ފުލުހުން ބުނެފައިވެ އެވެ.
