ރާއްޖޭގައި ފުރަތަމަ ފަހަރަށް ވިޔަފާރި އުސޫލުން އާލާކުރި މޫދު ވިނަ އެކްސްޕޯޓްކުރަން ތައްޔާރުވެއްޖެ އެވެ.
"ފްލޯޓިން އޭކަރސް" ނަމަކަށް ކިޔާ ކުންފުންޏަކުން ބ. ފެހެންދޫގައި ފެށި މި މަޝްރޫއު އިއްޔެ އިފްތިތާހު ކޮށްދެއްވީ ފިޝަރީޒް އެންޑް އޯޝަން ރިސޯސަސް މިނިސްޓަރު އަހުމަދު ޝިޔާމެވެ. މިއީ ރާއްޖޭގައި ފުރަތަމަ ފަހަރަށް ވިޔަފާރި އުސޫލުން ފަށާ މޫދު ވިނަ އާލާކުރުމުގެ މަޝްރޫއެވެ. މި މަޝްރޫއުގެ ސަބަބުން މެރިކަލްޗާ ދާއިރާގައި އިތުރު މަޝްރޫއުތައް ތަރައްގީކުރުމަށް މަގުފަހިވެގެންދާނެ ކަމަށް މިނިސްޓްރީ އޮފް ފިޝަރީޒް އެންޑް އޯޝަން ރިސޯސަސް އިން ބުނެފައިވެ އެވެ.
ވިޔަފާރި އުސޫލުން މޫދު ވިނަ އާލާކުރުމުގެ މި ކާމިޔާބު މަޝްރޫއު، މިނިސްޓަރު ޝިޔާމް ސިފަކުރެއްވީ އިގްތިސާދު ސިންދަފާތުކޮށް، ނޫ އިގްތިސާދު ކުރިއެރުވުމަށް ރައީސް މުއިއްޒު ގެންގުޅުއްވާ ތަސައްވުރު ހަގީގަތަކަށްވަމުން އަންނަކަން ދައްކައިދޭ ކާމިޔާބީއެއްގެ ގޮތުގަ އެވެ. މިނިސްޓަރު އިތުރަށް ވިދާޅުވީ އައު އީޖާދީ ކުރިއެރުންތައް ހޯދުމަށާއި ކަނޑުގެ މައްޗަށް ބަރޯސާވާ ދިރިއުޅުންތައް ތިޔާނގިކުރުމަށް ފްލޯޓިން އޭކާސް ކުންފުނިން ކުރަމުންދާ މަސައްކަތުގައި އިތުރު ކާމިޔާބުތަކަށް އެދިވަޑައިގަންނަވާ ކަމަށެވެ.
ދިވެހިރާއްޖެއަކީ 99 އިންސައްތަ ކަނޑު ހިއްސާކުރާ ގައުމަކަށްވާއިރު، ކުރިއަށް އޮތް އަހަރުތަކުގައި ގިނަ ރަށްރަށުގައި މޫދުވިނަ އާލާކުރުމުގެ މަސައްކަތް ފެށި، ރާއްޖޭގެ އިގްތިސާދަށް ބޮޑު ކުރިއެރުމެއް ލިބޭނެ ކަމަށް މިނިސްޓްރީން ބުނެފައިވެ އެވެ.
