މޯލްޑިވްސް ކަރެކްޝަނަލް ސާވިސްގެ އައު ހެޑްކުއާޓާސްގެ އިމާރާތް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ހުޅުވައިދެއްވައިފި އެވެ.

މި އިމާރާތް ތަރައްގީކޮށްފައިވަނީ ހުޅުމާލޭ ފުރަތަމަ ފިޔަވަހީގަ އެވެ. މޯލްޑިވްސް ކަރެކްޝަނަލް ސާވިސްގެ ހެޑްކުއާޓާސް އިމާރާތް ހުޅުވުމަށް ބޭއްވި ރަސްމިއްޔާތުގައި ހޯމް މިނިސްޓަރު އަލީ އިހްސާނާއި، ކޮމިޝަނާ އޮފް ޕްރިޒަންސް ހުސައިން ޒަރީރާއި، ކަރެކްޝަންސްގެ އިސްވެރިންނާއި އޮފިސަރުންނާއި މުވައްޒަފުން ބައިވެރިވެވަޑައިގެންނެވި އެވެ.

ހެޑްކުއާޓާސް ހުޅުވައިދެއްވުމަށްފަހު ރައީސް ޑރ. މުހައްމަދު މުއިއްޒު ވަނީ މެހެމާނުން ސޮއިކުރައްވާ ފޮތުގައި ސޮއިކުރައްވާފަ އެވެ. އަދި ހެޑްކުއާޓާސްގެ އާ އިމާރާތުގައި ހުރި ވަސީލަތްތައް އެމަނިކުފާނު ވަނީ ބައްލަވާލައްވާފަ އެވެ. މި އާ އޮފީސް އިމާރާތަކީ 2 ފަންގިފިލާގެ އިމާރާތެކެވެ. ކަރެކްޝަންސްގެ އައު ހެޑްއޮފީސް ގާއިމުކޮށްފައިވަނީ ގާތްގަނޑަކަށް 12,000 އަކަފޫޓުގެ ޖާގައެއްގަ އެވެ.

މޯލްޑިވްސް ކަރެކްޝަނަލް ސަރވިސްގެ ހެޑްކުއާޓާސް މީގެ ކުރިން ހިންގާފައި ވަނީ ކުއްޔަށް ހިފާފައިވާ އިމާރާތްތަކުގަ އެވެ. އެހެންނަމަވެސް، ހެޑްކުއާޓާސް އަމިއްލަ ބިމެއްގައި ހުޅުވިގެން ދިއުމަކީ މި ސާވިސްގެ ހިދުމަތްތަކަށް ލިބޭ ވަރަށް ބޮޑު ކުރިއެރުމެއްގެ ގޮތުގައި ކަރެކްޝަންސްއިން ފާހަގަކުރައްވަ އެވެ. މޯލްޑިވްސް ކަރެކްޝަނަލް ސާވިސްއަކީ ދިވެހިރާއްޖޭގެ ޖަލުތަކާއި ޕެރޯލްގެ ގާނޫނުގެ ދަށުން 31 ޑިސެމްބަރު 2013 ގައި އުފެއްދެވި މުއައްސަސާއެކެވެ.