ފުވައްމުލަކު ސިޓީގައި ފުލުހުންގެ އެކޮމޮޑޭޝަން ބްލޮކަކާއި އެކު ނެޝަނަލް ލައިބްރަރީގެ ގޮތްޕެއް ގާއިމުކުރުމުގެ އަމަލީ މަސައްކަތް މިއަދު ފަށައިފި އެވެ.

މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) އާ ހަވާލުކޮށްގެން ކުރިއަށް ގެންދާ މި ދެ މަޝްރޫއުގެ މަސައްކަތް ފަށާފައިވަނީ ރައީސުލްޖުމްހޫރިއްޔާ ޑރ. މުހައްމަދު މުއިއްޒު މިއަދު އެ ސިޓީއަށް ވަޑައިގެންނެވުމުން ބޭއްވި ރަސްމިއްޔާތެއްގަ އެވެ.

ފުލުހުންގެ އެކޮމޮޑޭޝަން ބްލޮކު މަޝްރޫއުގެ ދަށުން 11،965 އަކަފުޓޫގެ ސަރަހައްދެއްގައި ތިން ފަންގިފިލާގެ އިމާރާތެއް އަޅާނެ އެވެ. 19.7 މިލިއަން ރުފިޔާއަށް ހަވާލުކޮށްފައިވާ މި މަޝްރޫއު 360 ދުވަހުގެ ތެރޭގައި ނިންމަން ޖެހެ އެވެ. އެމްޓީސީސީން ބުނިގޮތުގައި، މި މަޝްރޫއު އާއެކު ރަށުގައި ކުށް މަދުކޮށް ރަށުގެ އިޖްތިމއީ ތަރައްގީއާއި އަމަންއަމާންކަން ގާއިމުކުރުމަށް ފުލުހުން ކުރަމުންދާ މަސައްކަތަށް އިތުރު ބާރެއް ލިބިގެންދާނެ އެވެ.

ނެޝަނަލް ލައިބްރަރީގެ ގޮފި ގާއިމުކުރުމުގެ މަޝްރޫއުގެ ދަށުން 11،250 އަކަފޫޓުގެ ސަރަހައްދެއްގައި ދެ ފަންގިފިލާގެ އިމާރާތެއް އަޅާނެ އެވެ. އެއީ 15.18 މިލިއަން ރުފިޔާއަށް 390 ދުވަހުގެ ތެރޭގައި ނިންމަން ހަވާލުކޮށްފައިވާ މަޝްރޫއު އެކެވެ. މި މަޝްރޫއު އާއެކު، އެ ރަށަށް އިލްމީ ގޮތުން އިތުރު ކުރިއެރުން ލިބިގެންދާނެ ކަމަށް އެމްޓީސީސީން ގަބޫލުކުރެ އެވެ.