300 ކިލޯއަށް ވުރެ ގިނަ ޑްރަގާ އެކު ލަންކާ ސަރަހައްދުން ހިފެހެއްޓި މަސް ބޯޓަށް، އެތަކެތި ބަރުކުރީ ރާއްޖެ ސަރަހައްދުން ނޫން ކަމަށް ފުލުހުން ބުނެފި އެވެ.
ފުލުހުން މިގޮތަށް ބުނެފައިވަނީ، އެ ބޯޓަށް މަސްތުވާތަކެތި ބަރުކުރީ ރާއްޖެއިން ކަމަށް ލަންކާގެ ބައެއް މީޑިއާތަކުން ރިޕޯޓުކޮށްފައިވަނިކޮށެވެ. އެ ނޫސްތަކުގައި ވާގޮތުން އެ ބޯޓުން މަސްތުވާތަކެތި ބަރުކުރީ ރާއްޖޭގެ ކަނޑުގެ ސަރަހައްދުގައި އޮވެގެންނެވެ. އެ ބޯޓު އަތުލައިގަނެ ފާސްކުރި އިރު 250 ކިލޯއަށް ވުރެ ގިނަ ކްރިސްޓަލް މެތާއި 85 ކިލޯގެ ހެރޮއިން ފެނިފައިިވާ ކަމަށްވެ އެވެ.
މި ރިޕޯޓުތަކާ ގުޅިގެން ފުލުހުން މިއަދު ބުނެފައިވަނީ 355 ކިލޯގެ މަސްތުވާތަކެއްޗާއެކު ލަންކާއިން އަތުލައިގަތް ބޯޓަކީ، ރާއްޖޭގެ ސަރަހައްދުން މަސްތުވާތަކެތި ބަރުކުރި ބޯޓެއް ނޫންކަން އެ ހިދުމަތަށް ކަށަވަރު ކުރެވިފައިވާ ކަމަށެވެ.
