ހިއުމަން ރައިޓްސް ކޮމިޝަން (އެޗްއާރުސީއެމް) ގެ މެމްބަރުކަމަށް ޑރ. އައިޝަތު ރަމީލާ އައްޔަނުކުރަން ރައްޔިތުންގެ މަޖިލީހުން މިއަދު ފާސްކޮށްފި އެވެ.
މި ސަރުކާރުގެ އެންމެ ފުރަތަމަ އެގްރިކަލްޗަރު މިނިސްޓަރު ރަމީލާ އަށް ރުހުން ހޯދުމުގެ މައްސަލަ މަޖިލީހަށް ފޮނުވީ މި މަހުގެ 2 ވަނަ ދުވަހު އެވެ. އެ މައްސަލަ ދިރާސާކުރީ މަޖިލީހުގެ ހިއުމަން ރައިޓްސް އެންޑް ޖެންޑާ ކޮމިޓީން ނެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި ވަނީ ރަމީލާއަށް ރުހުން ދިނުމާ މެދު ވޯޓެއް ނަގާފަ އެވެ. އެ ވޯޓުގައި އެޗްއާރުސީއެމްގެ މެމްބަރުކަމަށް އޭނާ އައްޔަނުކުރުމަށް ރުހުންދިނުމަށް ފާސްކުރީ 63 މެމްބަރުންގެ ވޯޓާ އެކު އެވެ.
އެޗްއާރުސީއެމް އަށް އާ މެމްބަރަކު އައްޔަނުކުރުމަށް ރުހުންދީފައި މިވަނީ، އެ ކޮމިޝަނުގައި ހުންނެވި މަރިޔަމް މުނާގެ މަގާމުގެ މުއްދަތު ހަމަވާތީ އެވެ.
ރަމީލާ އެގްރިކަލްޗާ މިނިސްޓަރު ކަމުން އިސްތިއުފާ ދެއްވީ އޭނާގެ ސިއްހީ ހާލުކޮޅު އޭރު ހުރި ގޮތުން ނެވެ.
