އައްޑޫ ސިޓީގެ ފޭދޫ، ހުޅުދޫ އަދި މީދޫ ރައްޔިތުންގެ ޚިޔާލު ހޯދުމަށް މިއަދު ނެގި އާއްމު ވޯޓުގެ ވަގުތީ ނަތީޖާއިން ދައްކާ ގޮތުން، ހުޅުދޫ އާއި މީދޫން ވަކި ކައުންސިލެއް އުފައްދަން ނިންމިއިރު، ވަކި ކައުންސިލެއް އުފައްދަން ބޭނުންނުވާކަމަށް ފޭދޫން ނިންމައިފި އެވެ.

އައްޑޫ 3 ރަށެއްގެ ރައްޔިތުންގެ މެދުގައި މިއަދު ނެގި ހިޔާލު ހޯދުމުގެ ވޯޓަކީ އައްޑޫ ސިޓީ ކައުންސިލް އެކުލެވިފައިވާގޮތް ބަދަލުކޮށް، އެ އަތޮޅުގެ ފޭދޫ، ހުޅުދޫ އަދި މީދޫގައި ވަކި ކައުންސިލްތައް އުފައްދަން ފެނޭތޯ ބެލުމަށް ނެގި ވޯޓެކެވެ. އަދި މިވޯޓަކީ ރައްޔިތުންގެ ހިޔާލު ހޯދުމަށް ވަކި ގާނޫނެއް ހަދައިގެން، އެ ގާނޫނުގެ ދަށުން ނެގި ހިޔާލު ހޯދުމުގެ ފުރަތަމަ ވޯޓެވެ.

އިލެކްޝަންސް ކޮމިޝަނުން މިހާތަނަށް އާއްމުކޮށްފައިވާ ވޯޓުގެ ނަތީޖާގައި، ހުޅުދޫން 68.73 % މީހުން ބޭނުން ވަނީ ވަކި ކައުންސިލެއް އުފައްދާށެވެ. ވަކި ކައުންސިލެއް އުފައްދަން ބޭނުން ނުވާކަމަށް އެރަށުން ވޯޓުދިނީ 31.27 % މީހުންނެވެ.

މީދޫގެ ނަތީޖާ ދައްކާ ގޮތުން ވެސް ބޮޑު ތަފާތަކުން އެރަށު ރައްޔިތުން ބޭނުންވަނީ ވަކި ކައުންސިލެއް އުފައްދާށެވެ. އެގޮތުން މިހާތަނަށް ނަތީޖާ ދައްކާގޮތުން 85.47 % މީހުން ބޭނުން ވަނީ ވަކި ކައުންސިލެއް އުފައްދާށެވެ. ވަކި ކައުންސިލެއް އުފައްދަން ބޭނުންނުވާކަމަށް މީދޫން ވޯޓު ދިނީ 14.53 % މީހުންނެވެ.

ނަމަވެސް، ހުޅުދޫ އާއި މީދޫއާ ހިލާފަށް ފޭދޫ ރައްޔިތުންގެ ވޯޓަށް ބަލާއިރު، 72.83 % މީހުން ބޭނުންވީ ވަކި ކައުންސިލެއް ބޭނުންނުވާ ކަމަށެވެ. ވަކި ކައުންސިލެއް އޮންނަން ބޭނުންވާކަމަށް ފޭދޫން ވޯޓު ދިނީ ހަމައެކަނި 27.17 % މީހުންނެވެ.