އަންނަ 2026 ވަނަ އަހަރުގެ ދައުލަތުގެ ބަޖެޓުގައި 500 މިލިއަން ރުފިޔާ ސިއްހީ އަދި ތައުލީމީ ދާއިރާއަށް ކަނޑައަޅުއްވާނެ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ރޭ އިއުލާނުކުރައްވައިފި އެވެ.

ށ. އަތޮޅުގެ މީހުން ދިރިއުޅޭ ރަށްތަކަށް ރައީސް ކުރައްވަމުން ގެންދަވާ ދަތުރުފުޅުގެ ތެރެއިން އެ އަތޮޅު ފުނަދޫއަށް ވަޑައިގެން އެ ރަށުގެ ރައްޔިތުންނާ ބައްދަލުކުރައްވާ ވާހަކަފުޅުދައްކަވަމުން ރައީސް ވިދާޅުވީ އެ ބަޖެޓު ބެގެންދާނީ ތައުލީމީ ދާއިރާ އާއި ސިއްހީ ދާއިރާއަށް މީގެކުރިން ނުދޭ ވަރަށް އިސްކަންދީފައިވާ ބަޖެޓަށް ކަމަށެވެ. އަދި އެ ދެ ދާއިރާގެ ތަރައްގީ ކަށަވަރުކުރަން ފުޅާދާއިރާއެއްގައި ކުރިއަށްގެންދާނެ މަޝްރޫއޫއުތައް ވެސް ހިމަނުއްވާނެ ކަމަށެވެ. އެގޮތުން، އަންނަ އަހަރުގެ ބަޖެޓުގައި ތައުލީމީ ދާއިރާއަށް 500 މިލިއަން، އަދި ސިއްހީ ދާއިރާއަށް 500 މިލިއަން ކަނޑައަޅުއްވާނެ ކަމަށް ވިދާޅުވި އެވެ.

ތައުލީ ދާއިރާއާ ގުޅިގެން ވާހަކަދައްކަވަމުން ރައީސް ވިދާޅުވީ އިންކްލޫސިވް އެޑިއުކޭޝަނާއި މަތީ ސާނަވީ ތައުލީމު މުޅި ރާއްޖެއަށް ފުޅާކުރުމަށް ސަރުކާރުން އިސްކަމެއް ދީގެން މަސައްކަތް ކުރާނެ ކަމަށެވެ، އެގޮތުން، ނުކުޅެދުންތެރިކަން ހުންނަ ދަރިވަރުންނަށް ބޭނުންވާ އިންކްލޫސިވް ކްލާސްރޫމްތައް، ރާއްޖޭގެ ހުރިހާ ސްކޫލެއްގައި ގާއިމުކުރުމުގެ މަސައްކަތާއި، ސްޕެޝަލް އެޑިއުކޭޝަން ދާއިރާއިން އިތުރު މުދައްރިސުން ތަމްރީނުކުރުމުގެ މަސައްކަތް އަންނަ އަހަރު ކުރިއަށްގެންދާނެ ކަން ހާމަކުރެއްވި އެވެ. އަދި ދަރިވަރުން ބޭނުންވާ ދާއިރާއަކުން މަތީ ސާނަވީ ފެންވަރަށް ކިޔެވޭނޭ ފުރުސަތު ފަހިކޮށްދެއްވައި، އަންނަ އަހަރު ވޮކޭޝަނަލް ހައި ސްކޫލެއްވެސް ގާއިމުކުރާނެ ކަމަށް ވިދާޅުވި އެވެ.

ސިއްހީ ދާއިރާއާ ގުޅިގެން ރައީސް އިއުލާނުކުރެއްވި ކަންކަމުގެ ތެރޭގައި ރާއްޖެއިން ބޭރަށް ގޮސް ހަދަންޖެހޭ ޓެސްޓުތަކާއި ސާޖަރީތައް، ރާއްޖޭގައި ހެދޭނޭ މަގުފަހިކުރުމަށް އަންނަ އަހަރު ގިނަ މަސައްކަތްތަކެއް ކުރުން ހިމެނެ އެވެ. އެގޮތުން މާލެ އާއި، ސަރަޙައްދީ ހޮސްޕިޓަލުތަކާއި، ވަކި ވަކި ރަށްތަކެއްގައި ސިއްހީ ހިދުމަތް ފުޅާކުރަން މަސައްކަތްތައް ކުރިއަށްގެންދަވާނޭކަމަށް އެމަނިކުފާނު ވިދާޅުވިއެވެ. އަދި މި މަސައްކަތްތައް ކުރާނީ އެމަނިކުފާނު ވިދާޅުވީ ޕްރިވެންޓެޓިވް އަދި ކިއުރެޓިވް ހެލްތުކެއާ އަށް ސަމާލުކަން ދީގެން ނެވެ.