މި ދައުރުގައި އަބުރުގެ ގާނޫނެއް އެކުލަވާލުމަށް ރައްޔިތުންގެ މަޖިލީހަށް ބިލެއް ހުށަހަޅަން މަސައްކަތްކުރަމުން އަންނަ ކަމަށް ބަންޑާރަނައިބު އަހުމަދު އުޝާމް މިއަދު ވިދާޅުވެއްޖެ އެވެ.
އުޝާމް މިފަދައިން ވިދާޅުވީ ރައްޔިތުންގެ މަޖިލީހުގެ މިއަދުގެ ޖަލްސާގައި މަނަދޫ ދާއިރާގެ މެމްބަރު ހުސްނީ މުބާރަކު ކުރެއްވި ސުވާލަކަށް ޖަވާބުދެއްވަމުން ނެވެ. ހުސްނީ އެޖީއާ ސުވާލުކުރެއްވީ އާއްމު ގަވާއިދުތަކާއި ބެހޭ ގާނޫނުގެ ދަށުން އެކުލަވާލެވުނު އަބުރާ ބެހުމުގެ ސަބަބުން ލިބޭ ގެއްލުމުގެ ބަދަލު ނަގައިދިނުމުގެ ގަވާއިދު ގާނޫނަކަށް ބަދަލުކުރަން ހުށަހެޅޭނެ ތާރީހަކާ ގުޅިގެން ނެވެ.
މި ސުވާލުގެ ޖަވާބުގައި ބަންޑާރަ ނައިބު ވިދާޅުވީ، އާއްމު ގަވާއިދުތަކާ ބެހޭ ގާނޫނު އެކުލަވާލެވުނީ އޭރު އެކުލަވާލެވިފައިވާ ގަވާއިދުތަކަށް ގާނޫނީ ބާރު ދިނުމަށް ކަމަށާއި އެ ގާނޫނުގެ ދަށުން އެކުލަވާލެވުނު ގަވާއިދުތައް މިހާރު ހުންނަންވާނީ ގާނޫނުތަކަށް ބަދަލުކުރެވިފައި ކަމަށް ގަބޫލުކުރައްވާ ކަމަށެވެ. އެކަމަކު އަބުރާ ބެހޭ ގަވާއިދު އަދިވެސް އޮތީ އެގޮތަށް ކަމަށް އޭނާ ވިދާޅުވި އެވެ.
" އަބުރުގެ ގަވާއިދު އެ ގާނޫނުން އުނިކުރެވޭނީ އަބުރުގެ ގާނޫނެއް އެކުލަވާލެވިގެން." އޭޖީ ވިދާޅުވި އެވެ.
އާއްމު ގަވާއިދުތަކާ ބެހޭ ގާނޫނު އަންނަ އަހަރުގެ އޭޕްރިލްގައި އުވިގެންދާނެ ކަން ފާހަގަކުރައްވާ އޭޖީ ވިދާޅުވީ، އޭގެ ކުރިން އަބުރުގެ ގާނޫނެއް ފާސްކުރުން މުހިއްމު ކަމަށެވެ. އެހެންވެ، އެ ގާނޫނު މި ދައުރުގެ ތެރޭގައި ހުށަހެޅުމަށް މަސައްކަތް ކުރައްވާ ކަމަށް ވިދާޅުވި އެވެ.
" މި ދައުރުގެ ތެރޭގައި ނުހިމެނިއްޖެ ކަމަށްވާނަމަ، އަންނަ އަހަރުގެ ފުރަތަމަ ދައުރުގެ ތެރޭގައި އެންމެ ލަސްވެގެން އަޅުގަނޑުމެން މަޖިލީހަށް އަބުރުގެ މި ގާނޫނު ހުށަހަޅާނަން" އޫޝާމް ވިދާޅުވި އެވެ.
ކުރީގެ ރައީސް އަބްދުﷲ ޔާމީނުގެ ވެރިކަމުގައި ވެސް ފާސްކުރި އެވެ. އެހެންނަނަމވެސް އޭގެ ފަހުން ވެރިކަމަށް ވަޑައިގެންނެވި ކުރީގެ ރައީސް އިބްރާހީމް މުހައްމަދު ސޯލިހު އެ ގާނޫނު އުވާލެއްވީ އެވެ، އެ ގާނޫނު އުވާލެވުނީ، އާއްމު ގަވާއިދުތަކާ ބެހޭ ގާނޫނަށް އަބުރާބެހުމުގެ ސަބަބުން ލިބޭ ގެއްލުމުގެ ބަދަލު ނަގައިދިނުމުގެ ގަވާއިދު އަލުން ހިމެނުމަށްފަހު އެވެ. އެހެންވެ މިހާރު އަބުރުގެ މައްސަލަތަކުގައި އަމަލުކުރަނީ އެ ގަވާއިދާ އެއްގޮތް ވާ ގޮތަށެވެ.
