މޯލްޑިވްސް އެއާޕޯޓްސް ކޮމްޕެނީ، އެމްއޭސީއެލްއިން ސަބްސިޑަރީ ކުންފުންޏެއް އުފައްދައިފި އެވެ.
އެމްއޭސީއެލްއިން ބިން ހިއްކުމާއި އުމްރާނީ މަސައްކަތްތައް ހިންގަން އުފެއްދި އެ ކުންފުނީގެ ނަމަކީ ޕެނިންސިއުލާ އިންފްރާސްޓްރަކްޗާ ޕްރައިވެޓް ލިމިޓެޑް އެވެ.
އެމްއޭސީއެލްއިން އެ ކުންފުންޏާބެހޭ އެއްވެސް މައުލޫމާތެއް އަދި ހާމަކޮށްފައި ނުވި ނަމަވެސް، އިކޮނޮމިކް މިނިސްޓްރީގެ ބިޒްނަސްޕޯޓަލްގައިވާ ގޮތުން، އެމްއޭސީއެލްގެ 100 ޕަސެންޓް ހިއްސާ އޮންނަ ގޮތަށް އެ ކުންފުނި އުފައްދާފައި ވަނީ މި އޮކްޓޫބަރު މަހުގެ ހަ ވަނަ ދުވަހު އެވެ.
އެ ކުންފުނީގެ މެނޭޖިން ޑިރެކްޓަރަކީ ބިޒްނަސް ޕޯޓަލްގައިވާ ގޮތުން އެމްއޭސީއެލްގެ ވެސް މެނޭޖިން ޑިރެކްޓަރު އިބްރާހިމް ޝަރީފު މުހައްމަދެވެ. އެމްއޭސީއެލްގެ ބޯޑު މެމްބަރުންގެ ތެރެއިން ޕެނިންސިއުލާ ކުންފުނީގެ ޑިރެކްޓަރަކަށް ހަމަޖައްސާފައި ވަނީ މުހައްމަަދު މިހާދު އެކަންޏެވެ.
އެމްއޭސީއެލްގެ ސަބްސިޑަރީ ކުންފުނި ޕެނިންސިއުލާގެ ޑިރެކްޓަރުން:
1- އިބްރާހިމް ޝަރީފު މުހައްމަދު (އެމްއޭސީއެލްގެ އެމްޑީ)
2- މުހައްމަދު މިހާދު (އެމްއޭސީއެލް ބޯޑު މެމްބަރު)
3- އަހުމަދު އަސްއަދު ހާޝިމް
4- ހުސައިން ރިޔާޒު
5- އަހުމަދު ސާނިއު
އާ ކުންފުނި "ޕެނިންސިއުލާ" ގުޅޭ ގޮތުން އެމްއޭސީއެލް އަދި ރަސްމީކޮށް ވާހަކައެއް ނުދައްކަ އެވެ.
ރާއްޖޭގެ ގިނަ ރަށްތަކަށް ދިމާވެފައިވާ ބިމުގެ ދަތިކަން ހައްލުކުރުމަށް ރަށްތަކުގެ ބިން ހިއްކުމާއި ހައުސިންގ އަދި އެއާޕޯޓް ގެ މަޝްރޫއުތައް ވެސް ކުރިއަށްދާއިރު، މީގެ ތެރެއިން ބިން ހިއްކުމުގެ ގިނަ މަސައްކަތްތައް ހަވާލުކޮށްފައި ވަނީ އެމްޓީސީސީއާ އެވެ. އެކަމަކު ބައެއް މަސައްކަތްތައް އެމްއޭސީއެލްއާ ވެސް ހަވާލުކޮށްފައިވާއިރު ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވީ ވިދާޅުވީ ސަރުކާރުގެ ކޮންމެ ކަމެއް ކުރަނީ ވެސް ޕްލޭނެއް އޮވެގެން ކަމަށާއި ބިން ހިއްކުމުގެ ހުރިހާ މަޝްރޫއުއެއް ވެސް ކުރިއަށް ގެންދާނީ އެއްފަހަރާ ކަމަށެވެ.
އެގޮތުން ބިން ހިއްކުމުގެ މަޝްރޫތައް އެއްފަހަރާ ބާރު ސްޕީޑުގައި ކުރިއަށް ގެންދިއުމަށް އެމްއޭސީއެލް އިން ތިން ޑްރެޖަރު ގެނައުމަށް ނިންމާފައިވާކަން އެމަނިކުފާނު އިއުލާންކުރެއްވި އެވެ. އެގޮތުން މި މަސް ނިމުމުގެ ކުރިން 11،000 ޓަނުގެ ޑްރެޖަރެއް ރާއްޖެ ގެނެވޭނެކަމަށާއި ނޮވެމްބަރު މަހުގެ ތިންވަނަ ހަފްތާގައި 40،000 ޓަނުގެ އިތުރު ޑްރެޖަރެއް ރާއްޖެ ގެނެވޭނެ ކަމަށާއި ތިންވަނަ ޑްރެޖަރު މި އަހަރުގެ ޑިސެމްބަރު މަހުގެ ތެރޭގައި ރާއްޖެ ގެނެވޭނެކަން ރައީސް ހާމަކުރެއްވި އެވެ.
