ށ. ފީވައް ހިމަނޭގޮތަށް، އުތުރުގެ ރަށްރަށުގަ ހުއްޓިފައި ހުރި ކުނި މެނޭޖުކުރާ މަރުކަޒުތައް ބިނާކުރުމުގެ މަޝްރޫއުތައް އަލުން ފެށުމުގެ އިންތިޒާމުތައް ކުރައްވަމުން ގެންދަވާކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު މިއަދު ވިދާޅުވެއްޖެ އެވެ.
އެމަނިކުފާނު މިފަދައިން ވިދާޅުވީ ށ. އަތޮޅުގެ މީހުން ދިރިއުޅޭ ރަށްރަށަށް މިހާރު ކުރައްވަމުން ގެންދަވާ ދަތުރުފުޅުގެ ތެރެއިން އެ އަތޮޅު ފީވަކު ރައްޔިތުންނާ ބައްދަލުކުރައްވައި ވާހަކަފުޅުދައްކަވަމުން ނެވެ.
ބޭރުގެ ފަންޑެއްގެ ދަށުން، އަމިއްލަ ކުންފުންޏަކާ ހަވާލުކޮށްގެން ކުރިއަށްގެންދާ ގޮތަށް ފަށާފައި ހުރި ކުނި މެނޭޖްކުރާ މަރުކަޒު އިމާރާތްކުރުމުގެ މަޝްރޫޢުތަކަށް އިޝާރާތްކުރައްވަމުން އެމަނިކުފާނު ވިދާޅުވީ، އެ މަސައްކަތްތައް އަލުން ފެއްޓޭނޭ ގޮތްތަކެއް ހޯދުމަށް ސަރުކާރުން ކުރި މަސައްކަތް ނާކާމިޔާބުވެފައިވާ ކަމަށެވެ. އެހެންވެ، މިހާރު އެކަމުގައި ކުރިއަށްދެވޭނެ އިތުރު ގޮތްތަކެއް ކަނޑައަޅައިގެން އެ އިންތިޒާމުތައް ކުރައްވަމުންދާ ކަމަށް ވިދާޅުވި އެވެ.
ފީވަކުގައި ގޯތި ދޫކޮށްފައިވާ ސަރަޙައްދު ބޭނުންކުރުމުގައި ހުރި ދަތިތަކަށް ވެސް ރައީސްގެ ވާހަކަފުޅުގައި އަލިއަޅުވާލެއްވި އެވެ. އެގޮތުން މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) ގެ ފަރާތުން އެ ރަށުގައި ސްކޫލް މަޝްރޫޢާއި، މޫދަށް އެރޭ ސަރަހައްދުގެ މަޝްރޫއު ކުރިއަށްގެންދާއިރު، ގޯތި ދޫކޮށްފައިވާ ޗަސްބިމަށް ފަސް އަޅައި، ބޭނުންކުރެވޭނޭ މަގުފަހިކޮށްދިނުމުގެ މަސައްކަތް ވެސް ކުރިއަށްގެންދާނޭ ކަމަށް އެމަނިކުފާނު ވިދާޅުވި އެވެ.
ރައީސް ފީވަކަށް ވަޑައިގެންނެވުމުން އެ ރަށުގައި ފިޓްނަސް އެންޑް ރެކްރިއޭޝަން ސެންޓަރުގެ ބިންގާ ވަނީ އަޅާފަ އެެވެ. އަދި، ރަށު ސްކޫލްގެ އާ އިމާރާތުއި ފުލުހުންގެ މަރުކަޒު އިމާރާތުގެ އަމަލީ މަސައްކަތް ވެސް މިއަދު ވަނީ ފަށާފަ އެވެ.
