ސަރުކާރުގެ އަމާޒަކީ ރާއްޖެއިން ހާސިލުކުރި 'ޓްރިޕްލް އެލިމިނޭޝަން' ގެ ކާމިޔާބީ ދަމަހައްޓައި، ދުޅަހެޔޮ އާބާދީއެއް ބިނާކުރުމަށް މެދުނުކެނޑި މަސައްކަތް ކުރުން ކަމަށް ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން ބުނެފި އެވެ.
މައިމީހާގެ ފަރާތުން ދަރިފުޅަށް އެޗް.އައި.ވީ، ހެޕަޓައިޓިސް ބީ އަދި ސިފިލިސް ޖެހުން ނައްތާލެވިފައިވާ ފުރަތަމަ ގައުމުގެ ދަރަޖަ ރާއްޖެއިން ވަނީ ހާސިލުކޮށްފަ އެވެ. މިކަމާ ގުޅިގެން އެޗްޕީއޭއިން ނެރުނު ބަޔާނުގައި ރާއްޖެއަށް "ޓްރިޕަލް އެލިމިނޭޝަން" ދިނުމަށް ދުނިޔޭގެ ސިއްހަތު ޖަމިއްޔާއިން ބެލި ކަންކަމުގެ ތެރޭގައި ފާހަގަކޮށްފައިވަނީ:
- މާބަނޑުވާ މިހުންގެ %95 އަށްވުރެ ގިނަ މީހުން މާބަނޑުވުމުގެ ކުރީކޮޅުގައި ޑޮކްޓަރަށް ދައްކައި، ސިފިލިސް، އެޗް.އައި.ވީ އަދި ހެޕަޓައިޓިސް ބީއަށް ޓެސްޓް ކޮށްފައި ވުން
- 2022 އަދި 2023ގައި މައިމީހާގެ ފަރާތުން އެޗް.އައި.ވީ އަދި ސިފިލިސް ޖެހިފައިވާ ކުއްޖަކު އުފަންވެފައި ނެތުން
- 2023 ވަނަ އަހަރު ސްކޫލްތަކުގެ ގްރޭޑް 1 ގެ ކުދިންގެ މެދުގައި ކުރެވުނު ސާވޭއަކުން ހެޕަޓައިޓިސް ބީ އަށް ޕޮޒިޓިވް އެއްވެސް ކުއްޖަކު ފެނިފައި ނެތުން
- ގިނަ އަހަރުތަކަކަށް ހެޕަޓައިޓިސް ބީ ވެކްސިން ޖަހާފައިވާ ނިސްބަތް %95އަށް ވުރެ މަތީގައި ހިފެހެއްޓިފައި ވުން
އެޗްޕީއޭ އިން ވަނީ މިހާރެކޭ އެއްފަދައިން ތުއްތު ކުދިންނަށް ގަވާއިދުން ވެކްސިން ދިނުމާއި، މާބަނޑުވުމުން އަވަހަށް ޑޮކްޓަރަށް ދައްކާ ޓެސްޓްތައް ހެދުމާއި، މާބަނޑު ދުވަސްވަރު އަދި ވިހެއުމަށްފަހު ވެސް ސިއްހީ ހިދުމަތްތެރިންގެ އިރުޝާދާއި އެއްގޮތަށް އަމަލުކުރުމަށް އިލްތިމާސްކޮށްފަ އެވެ. އަދި ސިއްހީ ދާއިރާގެ އަމާޒަކީ ރާއްޖެއަށް މިލިބުނު ކާމިޔާބު ދަމަހައްޓައި، ދުޅަހެޔޮ އާބާދީއެއް ބިނާކުރުމަށް މެދުނުކެނޑި މަސައްކަތް ކުރުން ކަމަށް ބުނެފައިވެ އެވެ.
ރާއްޖެއަކީ ސަރަހައްދުގެ ނިސްބަތުގައި ގައިންގަޔަށް އަރާ ގިނަ ބަލިތަކެއް ނައްތާލުމުގެ ކާމިޔާބު ހާސިލްކޮށްފައިވާ ގައުމެއްގެ ގޮތުގައި ވެސް ވަނީ ކަނޑައަޅާފަ އެވެ. އެގޮތުން މެލޭރިއާ، ފައިލޭރިއާ، ހިމަބިހި އަދި ރުބެއްލާ ނައްތާލެވިފައިވާކަމަށް ރާއްޖެ ވަނީ ސެޓިފައިކޮށްފަ އެވެ.
