އެންމެ މުހިންމީ ށ. ފޭދޫގެ ތައުލީމީ ދާއިރާ ތަރައްގީކުރުންކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެ އެވެ.
ރައީސް މިފަދައިން ވިދާޅުވީ، ށ. ފޭދޫއަށް ވަޑައިގެން އެ ރަށު ރައްޔިތުންނާ މިއަދު ހެނދުނު ބައްދަލުކުރައްވައި، ވާހަކަފުޅުދައްކަވަމުންނެވެ. ރައީސް ވިދާޅުވީ، ފޭދޫގައި ތަރައްގީކުރަން ފަށައި، ގިނަދުވަސްވެފައިވާ ސްކޫލްގެ އާ އިމާރާތުގެ މަސައްކަތް ނިންމުމަށް ވަރަށް ބޮޑު އިސްކަމެއްދެއްވާނެ ކަމަށެވެ. އަދި، ބާރު ދުވެލީގައި މަޝްރޫއު ކުރިއަށްގެންގޮސް ނިންމަވައިދެއްވާނެކަމަށެވެ.
ފޭދޫ ސްކޫލު ތަރައްގީ ކުރުމުގެ މަޝްރޫއު މަޑުޖެހިފައި އޮންނަތާ 2 އަހަރެއްހާ ދުވަސްވެދާނެ އެވެ. ދެފަހަރެއްގެ މަތިން އެ މަސައްކަތް ކުރުމަށް ކުންފުނިތަކާ ހަވާލުކުރިއެެވެ. އެގޮތުން އެންމެ ފަހުން އެ މަސައްކަތް ކުރުމަށް ހަވާލުކުރި ކުންފުނިންވެސް މަސައްކަތް ހުއްޓާލާފައި އޮންނަތާ 6 ވަަރަކަށް މަސް ވަނީ ވެފައެވެ. އެހެންކަމުން، މިފަހަރު، ކުޑަ ދުވަސްކޮޅެއްގެ ތެރޭގައި، ބާރު ދުވެލީގައި މިމަސައްކަތް ފައްޓަވައި، ބޮޑު އިސްކަމެއް ދެއްވައިގެން، ސްކޫލުގެ މަލްޓިޕަރޕަސް ހޯލާއި ކުލާސްރޫމްތައް ތަރައްޤީކުރުމުގެ މަޝްރޫޢު ކުރިއަށްގެންދާނެކަމަށް ރައީސް ވިދާޅުވި އެވެ.
ނިންމާލަމުން ރައީސް ވިދާޅުވީ ފޭދޫގެ ރައްޔިތުން އެދޭ ގޮތަށް އެރަށުގެ ކަންކަން ކުރިއަށް ގެންގޮސް ދެއްވާނެކަމަށެވެ.
