ށ. ބިލެތްފަހީގައި ތަރައްގީކުރާ އެއާޕޯޓަށް ބޭނުންވާ ބިންހިއްކައި ގިނަވެގެން 30 މަސް ދުވަހުގެ ތެރޭގައި މަސައްކަތްތައް ނިންމައި ހުޅުވައިދެއްވާނެ ކަމަށް ރައީސުލްޖުމްހޫރިއްޔާ ޑރ، މުހައްމަދު މުއިއްޒު ވިދާޅުވެއްޖެ އެވެ.
ރައީސް މިފަދައިން ވިދާޅުވީ، ބިލެތްފައްސަށް ވަޑައިގެން އެރަށުގެ ރައްޔިތުންނާ ބައްދަލުކުރައްވައި ވާހަކަދައްކަވަމުން ނެވެ. އެ ރަށުގަ އެއާޕޯޓު ތަރައްގީކޮށް އޮޕަރޭޓުްކުރުމުގެ މަސައްކަތް އެމްއޭސީއެލްއާ ހަވާލުކޮށްފައިވަނީ މި ބައްދަލުވުމުގަ އެވެ.
ރައީސް ވިދާޅުވީ އެއާޕޯޓާއެކު ރަށާއި ސަރަޙައްދީ ފެންވަރުގައި ބޮޑެތި ފައިދާތަކެއް ލިބޭނެކަމަށާއި އެ މަސައްކަތްތައް ކުރިއަށްދާ ގޮތް، ކޮންމެ ދުވަހަކު ވެސް ރައްޔިތުންނަށް ފެންނާނެ ކަމަށެވެ. ރައީސް ވަނީ އެ މަޝްރޫޢު މަޑުޖެހުމެއް ނެތި ކުރިއަށްގެންގޮސް ނިންމަވައިދެއްވާނެ ކަމުގެ ޔަގީންކަން ދެއްވާފައެވެ.
އެއާޕޯޓް މަޝްރޫއުގެ އިތުރުން އެ ރަށުގައި ހިންގާ މަޝްރޫއުތަކަށް އަލިއަޅުވާލައްވަމުން ރައީސް ވިދާޅުވީ ރަށުގެ ތަރައްގީއަށް މުހިންމު ކަންތައްތަކެއް ކުރަން ހުރިކަމަށެވެ. އެންމެ ފުރަތަމަ ކަމެއްގެ ގޮތުގައި ރައީސް ފާހަގަކުރެއްވީ، ރަށުގެ ފެނާއި ނަރުދަމާ ނިޒާމުގެ މަޝްރޫއުވެ އެ މަސައްކަތް ކުރިއަށްދާނެކަމުގެ ޔަގީންކަން ދެއްވަމުން އެމަނިކުފާނު ވަނީ އެ ރަށުގަ ކުރިއަށް ނުގޮސް، ހުއްޓިފައި އޮތް ކުނި މެނޭޖު ކުރުމުގެ މަޝްރޫއަށްވެސް ހައްލު ހޯއްދަވައިދެއްވާނެކަމަށް ވިދާޅުވެފަ އެވެ.
ބަނދަރުގެ މަޝްރޫއަކީ އެންމެ ބޮޑު އެއް މަސައްކަތް ކަމުގައި ފާހަގަކުރައްވައި، ވާހަކަފުޅުދައްކަވަމުން ރައީސް ވަނީ، ކަމުގެ ހައްސާސް ކަމަށް ބަލައި، އެ މަޝްރޫއު ކުރިއަށް ގެންދާނީ ރައްޔިތުންގެ މަޝްވަރާއެކު ކަމަށް ވިދާޅުވެފަ އެވެ. .
