ވިހަ މާއްދާ ހިމެނޭ ކެއްސުމަށް ބޭނުންކުރާ ބޭހަކީ ރާއްޖެ އެތެރެކޮށް ވިއްކާ ބޭހެއް ނޫން ކަމަށް މޯލްޑިވްސް ފުޑް އެންޑް ޑުރަގު އޮތޯރިޓީ (އެމްއެފްޑީއޭ)ން މިއަދު ބުނެފިއެވެ.
އިންޑިއާގެ ތިން ކުންފުންޏަކުން އުފައްދާފައިވާ ކެއްސުމަށް ބޭނުންކުރާ ބޭހެއްގައި ވިހަ މާއްދާއެއް ކަމަށްވާ ޑައިއެތިލް ގްލައިކޯލް (ޑީއީޖީ) ހުރުމުން، އެ ބޭސްތައް ބޭނުންކުރުމާއި ވިއްކުން ވަނީ މަނާކޮށްފަ އެވެ. އެކަން ސައުތު އީސްޓް އޭޝިއާ ރީޖަން ނެޓްވާކް (ސިއާން) އިން ވަނީ އެމްއެފްޑީއޭއަށް އެލާޓްކޮށްފަ އެވެ.
މި މައްސަލައިގަ އެމްއެފްޑީން ނެރުނު ބަޔާނެއްގައި ބުނެފައިވަނީ އެ ބޭސް އުފެއްދި ތިން ކުންފުންޏަކީ ރާއްޖެއަށް ބޭސް އިމްޕޯޓް ކުރަން އެ އޮތީރިޓިން ހުއްދަ ދީފައިވާ ބައެއް ނޫން ކަމަށެވެ. އަދި، އެ ކުންފުނިތަކުން އުފައްދާ އެއްވެސް ބޭހެއް، ރާއްޖެ އެތެރެނުކުރާކަން ޔަގީން ކުރެވިފައިވާ ކަމަށް އެ އޮތީރިޓީން ބުނެފައިވެ އެވެ.
މީގެއިތުރުން، އެ އޮތީރިޓީން ވަނީ އިންޑިއާއަކީ ގިނަ އަދަދެއްގެ ދިވެހީން ބޭސްފަރުވާއަށް ގޮސް އުޅޭ ގައުމަކަށްވާތީ، ބައެއް ހާލަތްތަކުގައި އަމިއްލަ ބޭނުމަށް އިންޑިއާއިން ބޭސް އެތެރެކުރާއިރު އެކަމަށް ސަމާލުވުމަށް އިލްތިމާސްކޮށްފަ އެވެ.
އެމްއެފްޑީއޭއިން ބުނެފައިވަނީ ރާއްޖެ އެތެރެކުރާ ބޭހުގެ ރައްކާތެރިކަން ކަށަވަރު ކުރުމަށް އަބަދުވެސް މަސައްކަތް ކުރާ ކަމަށެވެ. ހާއްސަކޮށް ކުޑަކުދިންނަށް ދޭ ބޭސްތަކުގައި މިހާރު ފާހަގަކުރެވޭ މައްސަލަތައް ހައްލުކުރަން މަސައްކަތް ކުރާ ކަން ފާހަގަކޮށްފައިވެ އެވެ. އެ އޮތޯރިޓީން ބުނެފައިވަނީ ކެއްސުމާއި ރޯގާއަށް ދޭ ކުޑަކުދިންގެ ބޭސް އެތެރެކުރާއިރު ޑީއީޖީ އަދި އީޖީ ނުހިމެނޭކަން ކަށަވަރުކުރާ ކަމަށެވެ.
