ރާއްޖެ ފަދަ ސައްތައިން ސައްތަ އިސްލާމީ ގައުމެއްގައި އެންމެ އިސްކަން ދޭން ޖެހޭނީ ކީރިތި ގުރުއާން ކިޔެވުމަށް ހިތްވަރު ދިނުމާއި ބާރު އެޅުމަށްކަމަށް ރައީސުލްޖުމުހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެ އެވެ.
ކީރިތި ގުރުއާން ކިޔެވުމުގެ 37 ވަނަ ގައުމީ މުބާރާތުގެ ނަތީޖާ ފާޅުކުރުމުގެ ޖަލްސާ ޝަރަފުވެރިކޮށްދެއްވައި ވާހަކަފުޅުދައްކަވަމުން ރައީސް ވިދާޅުވީ، ގުރުއާން ކިޔެވުމަށް ބާރު އެޅުމަށާއި ހިތްވަރު ދިނުމަށް އަދި އެ ދާއިރާ އިން ކުރިއަށް ދިއުމަށް ހުރިހާ މަގުތަކެއް ފަހިކޮށްދޭން ޖެހޭނެ ކަމަށެވެ. އަދި ސަރުކާރުން ކީރިތި ގުރުއާން ކިޔެވުމުގެ ގައުމީ މުބާރާތަށް ހާއްސަ އިސްކަމެއް ދޭން ނިންމީ މި ގައުމުގެ ދަރިން ތަރުބިއްޔަތުކޮށް، ބައްޓަންކުރުމުގެ ބޭނުމުގައި ކަމަށެވެ.
މީގެއިތުރުން، ރައީސް ވަނީ ދިވެހީންގެ ތެރޭގައި ކުރީގައި އޮތް ގުރުއާން ކިޔެވުމުގެ ރީތި އާދަތައް އަނބުރާ ގެނައުމަށް އިލްތިމާސް ކުރައްވައިފަ އެވެ އެގޮތުން، ދެ ނަމާދު ދޭތެރޭގައި ގޭގަ އާއި މިސްކިތްތަކުގައި ގުރުއާން ކިޔެވުން ފަދަ އާދަތައް ބުރަކޮށް އުޅުނު ނަމަވެސް އެފަދަ އާދަތަކަށް ވަގުތު ހޯދުމަށް އެދިވަޑައިގެންނެވި އެވެ.
ރައީސް ވިދާޅުވީ އިސްލާމް ދީނުގައި އިސްކަން ދީފައިވާ ކަންކަން ވަގުތު ނެތިގެން ނުކުރެވިއްޖެ ނަމަ އުފާ ފާގަތި ކަމާއި އަމާންކަން ނޯނާންނެ ކަމަށެވެ. ރައީސްގެ ވާހަކަފުޅު ނިންމަވާލެއްވީ ރާއްޖޭގެ މުސްތަގްބަލު އޮތީ އިސްލާމް ދީނުގައި އަންގަވާފައިވާ ގޮތަށް ކުރިއަށް ދިއުމުންކަން ހަނދާންކޮށްދެއްވަމުން ނެވެ.
