ގުރުއާން ކިޔެވުމުގެ 37 ވަނަ ގައުމީ މުބާރާތުގެ ފަހުރުވެރި ރަން ވަނަތައް ހާސިލުކުރި ފަރާތްތަކަށް ރައީސުލްޖުމްހުރިއްޔާ ޑރ. މުހައްމަދު މުއިއްޒު އިނާމު ދެއްވައިފި އެވެ.
މައިގަނޑު ތިން ކެޓަގަރީއަކަށް ބަހާލައިގެން ކުރިއަށް ގެންދިޔަ މި މުބާރާތް ވެގެންދިޔައީ އެންމެ އަގުހުރި އިނާމު ލިބިގެންދިޔަ މުބާރާތަކަށެވެ. މި މުބާރާތުން ވަނަ ހާސިލުކޮށްފައިވަނީ:
- ހާފިޒުގެ ގޮފިން، މުޅި މުބާރާތުން އެއް ވަނަ: ތަދްރީސުލް ގުރުއާނުލް ކަރީމްގެ ފަރާތުން ބައިވެރިވި ފާތިމަތު ޝާޔާ ޒާހިރު
- މުޅި މުބާރާތުން ނުބަލާ ކިޔެވުމުގެ ގޮފިން އެެއް ވަނަ : މިލަދުންމަޑުުލު އުތުރުބުރީ އަތޮޅު ކައުންސިލްގެ ފަރާތުން ބައިވެރިވި އާއިޝަތު ޝަބާ
- މުޅި މުބާރާތުން ބަލައިގެން ކިޔެވުމުގެ ގޮފިން އެއްވަނަ: ހައްދުންމަތީ އަތޮޅު ކައުންސިލްގެ ފަރާތުން ބައިވެރިވި އަހުމަދު ޝައިމް ރިޒާ
ގައުމީ ގުރުއާން މުބާރާތުގައި ގުރުއާން ކިޔެވުމުގެ ގައުމީ މުބާރާތުން 1 ވަނަ ހޯދި ފަރާތްތަކަށް ރައީސުލްޖުމްހޫރިއްޔާގެ ޝަރަފުގެ ފިލަޔާއި، 1 ލައްކަ ރުފިޔާގެ ފައިސާގެ އިނާމާއިބޭނުން ރޮނގަކުން ބޭނުން ޤައުމަކުން ޕީއެޗްޑީއަށް ކިޔެވުމަށް ހާއްސަ ސްކޮލާޝިޕާއި، ކީރިތި ގުރުއާނާބެހޭ ގައުމީ މަރުކަޒާއި މޯލްޑިވްސް ޒަކާތު ހައުސްއާއި އިސްލާމިކް ޑިވެލޮޕްމަންޓް ފަންޑު ހިމެނޭހެން މިނިސްޓްރީ އޮފް އިސްލާމިކް އެފެއާޒުންދޭ 75 ހާސް ރުފިޔާގެ ފައިސާގެ އިނާމާއި ހަނދާނީ ލިޔުމާއި، ޓްރޮފީއާއި އަދި މޯލްވިސް ހައްޖު ކޯޕަރޭޝަން ލިމިޓެޑުގެ ފަރާތުން ދެވުނު އުމްރާ ދަތުރެެއް ވަނީ ލިބިގެން ގޮސްފަ އެވެ.
ގުރުއާން މުބާރާތުން އެއް ވަނަ ހޯދާ ފަރާތްތަކަށް މިފަދަ އިނާމުތަކެއް ދީފައިވާއިރު، އެ މުބާރާތަކީ ރާއްޖޭގައި ބާއްވާ އެންމެ ފަހުގެ އެންމެ އަގުބޮޑު އަދި އެންމެ ގިނަ އިނާމު ދެވޭ މުބާރާތް ކަމުގައި ހެދުމަކީ ސަރުކާރުގެ އަމާޒެކެވެ. ރައީސް މިގޮތަށް ނިންމެވީ، އެންމެ ބޮޑު ހިތްވަރެއް ދޭންޖެހޭނީ އަދި އެންމެ ބޮޑު އިނާމްތަކެއް ދެވެން ވާނީ މާތް ﷲ ގެ މަތިވެރި ކަލާމްފުޅު އެންމެ ރީތިކޮށް ކިޔެވުމަށް ކަމަށް ގަބޫލުފުޅުކުރައްވާތީ އެވެ.
