އދ އޮމަދޫ ސިއްހީ މަރުކަޒުގެ އައު އިމާރާތުގެ އަމަލީ މަސައްކަތް ފަށައިފި އެވެ.

މި މަޝްރޫއުގެ އަމަލީ މަސައްކަތް ފަށާފައިވަނީ ރައިސުލްޖުމްހޫރިއްޔާ ޑރ. މުހައްމަދު މުއިއްޒު އދ. އަތޮޅުގެ ރަށްތަކަށް ކުރެއްވި ދަތުރުފުޅުގެ ތެރެއިން އެ އަަތޮޅުގެ އަޮމަދޫއަށް އިއްޔެ ވަަޑައިގެންނެވުމުން ބޭއްވި ރަސްމިއްޔާތުގަ އެވެ. މި ރަސްމިއްޔާތުގައި ސިއްހީ މަރުކަޒުގެ އަމަލީ މަސައްކަތް ފައްޓަވައިދެއްވީ ޕްލޭނިން މިނިސްޓަރު މޫސާ ޒަމީރެވެ.

މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕަނީ (އެމްޓީސީސީ) އާ ހަވާލުކޮށްފައިވާ މި މަޝްރޫއުގެ ދަށުން، 16 އެނދުގެ އިމާރާތެއް އިތުރުކުރާނެ އެވެ. މި އިމާރާތުގަ ޓްރައިއޭޖް ސަރަހައްދަކާއި، ބަލި މީހުން އެކަހެރިކުރާ ކޮޓަރިއަކާއި، އަންހެނުންގެ ވޯޑަކާއި، ކުޑަކުދިންގެ ވޯޑެއްގެ އިތުރުން ވިއްސާ ކޮޓަރިއަކާއި ޕްރައިވެޓް އަދި ފަރުވާދޭ ކޮޓަރިތައް ހަދާނެ އެވެ. 27.23 މިލިއަން ރުފިޔާއަށް ހަވާލުކޮށްފައިވާ މި މަޝްރޫއު 360 ދުވަސްތެރޭގައި ނިންމަންޖެހޭނެ އެވެ.

ސިއްހީ މަރުކަޒުގެ އައު އިމާރާތުގެ މަސައްކަތުގެ އިތުރުން، އެރަށުގައި ޕޮލިސް ސްޓޭޝަނެއް އިމާރާތްކުރުމުގެ އަމަލީ މަސައްކަތް ވެސް މިއަދު ފަށާފައިވެ އެވެ. މި އެމްޓީސީސީއާ ހަވާލުކޮށްފައިވާ މި މަޝްރޫއުގެ އަމަލީ މަސައްކަތް ފައްޓަވައިދެއްވީ ހޯމް މިނިސްޓަރު އަލީ އިހުސާނެވެ. މި މަޝްރޫއުގެ ދަށުން، 2000 އަކަފޫޓުގެ ސަރަހައްދެއްގައި ބިންގަނޑުގެ މަސައްކަތްތަކާއި، ކޮންކްރީޓް މަސައްކަތްތަކާއި، މޭޝަނަރީ، ފުރާޅު އަދި ފިނިޝިންގެ މަސައްކަތް ކުރާނެއެވެ. އަދި ކަރަންޓު ވަޔަރު ކުރުމުގެ މަސައްކަތްވެސް ކުރާނެ އެވެ. މިއީ 150 ދުވަސްތެރޭ ނިންމާގޮތަށް، 2.20 މިލިއަން ރުފިޔާއަށް ހަވާލުކޮށްފައިވާ މަޝްރޫއުއެކެވެ.

އެ ރަށުގައި ވޮލީ ކޯޓެއް އެޅުމުގެ މަސައްކަތް ވަނީ މިއަދު ފަށާފަ އެވެ. އެއީ ވެސް އެމްޓީސީސީން ކުރިއަށްގެންދާ މަސައްކަތެކެވެ.