ޕެޕާ ސްޕްރޭއަކީ އޭގެ ޒާތުގައި ސީދާ ހާޓް އެޓޭކް ޖެހޭފަދަ އެއްޗެއް ނޫންކަމަށް އައިޖީއެމްއެޗްއިން ބުނެފި އެވެ.
އައިޖީއެމްއެޗްއިން މިހެން ބުނީ ހުކުރު ދުވަހުގެ ރޭ އެމްޑީޕީއިން ބޭއްވި "ލޫޓުވާލައިފި" މުޒާހަރާގެ ތެރެއިން ހާޓް އެޓޭކެއް ޖެހި ހާލު ދެރަވި މީހާއާ ގުޅޭގޮތުން ނެރުނު ބަޔާނެއްގަ އެވެ.
އެ ބަޔާނުގައި ބުނެފައި ވަނީ މުޒާހަރާގެ ބައިވެރިއަކު މޭގައި ރިއްސާ ހާޓް އެޓޭކެއް ޖެހުނު ހާދިސާއާ ގުޅޭގޮތުން ހުރި ކަންބޮޑުވުންތައް އައިޖީއެމްއެޗްގެ ސަމާލު ކަމަށް އައިސްފައިވާ ކަމަށެވެ. އަދި ޖީއެމްއެޗް އިން ވަނީ ހާޓް އެޓޭކް ޖެހޭ ގޮތް މި ބަޔާނުގައި ކިޔާދީފަ އެވެ.
ހާޓް އެޓޭކް އާންމުކޮށް ޖެހެނީ ސިއްހީ ކޮންމެވެސް ސަބަބަކާ ހުރެ ހިތުގެ ލޭ ހޮޅިތައް ބެދި ނުވަތަ ލޭ ހޮޅިއެއް ބެދި ހިތުން ބަޔަކަށް ލޭ ފޮނުވުމުން ހުއްޓުމުން ކަމަށްވެސް އެ ބަޔާނުގައި ވެއެވެ. އަދި، މިހެން އާންމުކޮށް ދިމާވަނީ އެ މީހާގެ ހުންނަ ކޮންމެވެސް ސިއްހީ މައްސަލަތަކަކާއި ގުޅިގެން ކަމަށްވެސް މި ބަޔާނުގައި ފާހަގަކޮށްފަވެ އެވެ.
އައިޖީއެމްއެޗް އިން ބުނިގޮތުގައި ޕެޕާ ސްޕްރޭ ޖެހުމުގެ ސަބަބުން ނޭވާއަށް އުންދަގޫ ވިޔަސް އެޔަކީ އޭގެ ޒާތުގައި ހާޓް އެޓޭކް ޖެހުމަށް މަގުފަހިކުރާ އެއްޗެއްނޫން ކަމަށް ބަޔާނުގައި ވެއެވެ. އަދި ތަފާތު ގޮތްގޮތުން އުފުލާ ބުރައިގެ ސަބަބުން ސިއްހީ މައްސަލަތައް ހުންނަ މީހަކަށް ހާޓް އެޓޭކް ޖެހުން ފަދަ ކަމެއް ދިމާވެދާނެ ކަމަށް ހޮސްޕިޓަލުން ބުންޏެވެ.
އައިޖީއެމްއެޗުން އިތުރަށް ބުނި ގޮތުގައި، ބަލިމީހާއަށް ފަރުވާ ދީ، ހާލު ރަނގަޅުވެ މިހާރު ސީސީޔޫގައި ވަނީ އެޑްމިޓްކޮށްފަ އެވެ. އަދި އެ ހޮސްޕިޓަލުން ފަރުވާ ހޯދާ ކޮންމެ މީހަކަށް ހާލަތަށް ބަލައި އެ ވަގުތު ދޭން ޖެހޭ ފަރުވާ އެންމެ ފުރިހަމައަށް އަބަދު ވެސް ދޭނެ ކަމުގެ ޔަގީންކަން އެ ބަޔާނުގައި ދީފައިވެ އެވެ.
