ދެކުނުގެ އަތޮޅުތަކަށް އަމާޒުކޮށްގެން "ސަދަން ކޮންފަރެންސް ފޮރ ކޮމިއުނިޓީ ހެލްތް އެންޑް ވެލްބީންގ" ގެ ނަމުގައި ކޮންފަރެންސެއް ބާއްވަން ހަމަޖައްސައިފި އެވެ.

މި ކޮންފަރެންސަކީ ކޮމިއުނިޓީ ނަރސް ވޮލަންޓިއަރސް އެންޖީއޯ އާއ ޑރ. ޢަބްދުއްޞަމަދު މެމޯރިއަލް ހޮސްޕިޓަލް އަދި ޔުނިސެފް ގުޅިގެން، ބާއްވާ ކޮންފަރެންސެކެވެ. އަދި މި ކޮންފަރެންސް އިންތިޒާމުކޮށްފައިވަނީ އެމްއެންޔޫ އާއި ހެލްތު މިނިސްޓްރީގެ ވަރަށް ބޮޑު އެއްބާރުލުމަކާއި އެކުގަ އެވެ.

މި ކޮންފަރެންސް އޮންނާނީ އޮކްޓޯބަރު މަހުގެ 8 ވަނަ ދުވަހުން 9 ވަނަ ދުވަހުގެ ނިޔަލަށެވެ. މި ކޮންފަރެންސްގައި ގދ.، ގއ.، ސ. އަދި ޏ. އަތޮޅުގެ ސިއްހީ އަދި އިޖްތިމާއީ ދާއިރާގެ މަސައްކަތްތެރިންނާއި، މުއައްސަސާތަކުގެ އިސްވެރިން ބައިވެރިވެ ވަޑައިގަންނަވާނެ އެވެ. މީގެ އިތުރުން، އެކި ދާއިރާތަކުގެ ފަންނީ ބޭފުޅުން ފެސިލިޓޭޓަރުންގެ ގޮތުގައި ބައިވެރިވެ ވަޑައިގަންނަވާނެ އެވެ.

ޑރ. އަބްދުއްސަމަދު މެމޯރިއަލް ހޮސްޕިޓަލުން މައުލޫމާތުދިން ގޮތުގައި  މި ކޮންފަރެންސްގެ މައިގަނޑު ބޭނުމަކީ، ދެކުނުގެ އަތޮޅުތަކުގައި ހުރި ސިއްހީ ގޮންޖެހުންތަކަށް އަލިއަޅުވާލުމާއި، ސިއްހީ ހިދުމަތްތެރިންނަށް ތަޖުރިބާ ހިއްސާކުރުމުގެ ފުރުސަތު ދިނުމެވެ. އަދި މި ދާއިރާގައި ހުރި މައްސަލަތަކަށް އަވަސް ހައްލުތަކެއް ހޯދުމަށް މަގުފަހިކުރުމަކީވެސް މި ކޮންފަރެންސްގެ މުހިންމު މަގްސަދެކެވެ.

ކޮންފަރަންސް ނިމިގެންދާއިރު ފާހަގަ ކުރެވުނު މައިގަޑު މައްސަލަ ތަކަށްއަވަސް ހައްލު ތަކެއް ހިމެނޭ  ރެކަމަންޑޭޝަންތަކާއި މިކަންތަށް ތަށް ކުރުމަށްނެޓްވަރކް ތަކެއްވެސް އުފެދިގެން ދާނެ ކަމަށް ހޮސްޕިޓަލުން ބުނެފައިވެ އެވެ. މި ކޮންފަރެންސްގައި ދެކުނު ސަރަހައްދުގައި ހުރި އިޖްތިމާއީ އަދި ޞިއްޙީ ކަންކަމަށްއަމާޒުކޮށް ތަފާތު ރޮނގު ރޮނގުން، ގުޅުންހުރި ކަރުދާސް ހުށަހެޅުމާއި އެކު މަޝްވަރާކުރާނެ ކަމަށާއި، އިޖްތިމާއީ ޞިއްޙީ ކަންކަން އިތުރަށް ހަރުދަނާ ކުރުމަށްކުރެވިދާނެ ހަރަކާތްތައް ފާހަގަކޮށް ގުޅުންހުރި ފަރާތްތަކާއި ހިއްޞާ ކުރުމަކީވެސް މިކޮންފަރެންސްގެ މަގްސަދެއް ކަމަށް ހޮސްޕިޓަލުން ބުނެފައިވެ އެވެ.

މި ކޮންފަރެންސް އަށް ތައްޔާރުވުމުގެ ގޮތުން 18،19 އެޕްރީލް ގައި ތިނަދޫ ސިޓީގައި ވަނީ ޕްރީ ކޮންފަރެންސް ވޯކްޝޮޕް އެއް ވެސް ބާއަވާފައެވެ. އަދި އެގެ އިތުރުން 25 ސެޕްޓެމްބަރ ގައި އޮންލައިންކޮށް ވެސް ވޯކްޝޮޕެއް ހިންގިފައިވެ އެވެ.