އެމްޑީޕީން މިރޭ ކުރިއަށްގެންދާ މުޒާހަރާއަށް އާންމުން ނެރުނީ އޮޅުވާލައިގެން ކަމަށް ބުނެ، ބައެއް އާންމުން ކަންބޮޑުވުން ފާޅުކޮށްފި އެވެ.
މިރޭ 8:30 ގައި ފެށި އެމްޑީޕީގެ މުޒާހަރާ އަށް އިއްޔެއިން ފެށިގެން އެ ޕާޓީން ވަނީ ޕާޓީގެ ޚަރަދުގައި އަތޮޅުތެރެއިން ވެސް މީހުން މާލެ ގެނެސްފަ އެވެ. މުޒާހަރާ ފެށުނު އިރު އާޓިފިޝަލް ބީޗު ސަރަހައްދުގައި ހާހެއްހާ މީހުން ވެސް ހަމަ ނުވެ އެވެ.
މުޒާހަރާއަށް ފުލުހުން ރޫޓެއް ކަނޑައަޅާ ހުއްދަދިން ނަމަ ވެސް، އެމްޑީޕީން ނިކުތީ ރޫޓާ ޚިލާފަށް ބެރިކޭޑުތައް ފަޅާލާފަ އެވެ.
މުޒާހަރާ ފެށިގެން ބައިގަޑިއިރެއްހާ ތެރޭ، އާންމުން އެނބުރި ގެއަށްދާ ވީޑިއޯތައް ސޯޝަލް މީޑިއާގައި އާންމުވެފައިވެ އެވެ. އެމީހާއާ ސުވާލުކުރުމުން ޖަވާބުގައި ބުނީ "އެތަނަށް ގެނައި އޮޅުވާލައިގެން" ކަމަށެވެ. އެއްވުމުގެ ބައިވެރިން ހެންވޭރު ޖެލީ ކުރިމަތީގައި ތިބި އިރު އާޓިފިޝަލް ބީޗާ ހަމައަށް ވެސް މިހާރު މީހުންގެ އަދަދު ހަމަ ނުވެ އެވެ.
މުޒާހަރާ ފެށި ގޮތަށް އެކްޓިވިސްޓުން ވަނީ ބެރިކޭޑުތައް ނަގައި، މަގުމަތީގައި ހަމަނުޖެހުން އުފައްދާފަ އެވެ. އަދި، ފުލުހުން އެގޮތަށް އަމަލު ނުކުރުމަށް ނަސޭހަތްތެރި ވުމުންވެސް، މުޒާހަރާގެ ބައެއްބައިވެރިން ވަނީ، ފުލުހުންނާ ދިމާލަށް ގަލާއި ފެންފުޅި އުކާ، ފުލުހުންގެ އާލާތްތަށް ނަގަން މަސަތްކަތްކޮށްފަ އެވެ.
މިކަމާ ގުޅިގެން ފުލުހުން ބުނީ ފުލުހުންގެ ވާޖިބު އަދާކުރުމަށް ހުރަސްއަޅައި، ހުއްދަ ދިން ރޫޓާ ޚިލާފަށް ކުރިއަށްދާނަމަ،ގާނޫނީ ފިޔަަވަޅު އަޅާނެކަމަށެވެ. ފުލުހުންގެ ވާޖިބު އަދާކުރުމަށް ހުރަސްނާޅަން ފުލުހުން އިލްތިމާސްކުރި އެވެ.
