ފެނަކަ ކޯޕަރޭޝަނާ ގުޅުންހުރި ކޮރަޕްޝަންގެ 161 މައްސަލައެއް ތަހުގީގުކުރަމުންދާ ކަމަށާއި އެ މައްސަލަތަކާ ގުޅިގެން 21 މިލިއަނަށް ވުރެ ގިނަ ރުފިޔާ އަނބުރާ ހޯދަން އެ ކުންފުންޏަށް އަންގާފައިވާ ކަމަށް އެންޓި ކޮރަޕްޝަން ކޮމިޝަން (އޭސީސީ) އިން މިއަދު ބުނެފި އެވެ.

މިދިޔަ ހަފްތާގަ އޮޑިޓު އޮފީހުން ނެރުނު ރިޕޯޓަކުން ވަނީ 2021 އިން 2023 އާ ދެމެދު ފެނަކައިން ހިންގާފައިވާ މުއާމާލާތްތަކުގައި ކޮރަޕްޝަންގެ ބޮޑެތި އަމަލުތަކެއް ފަޅާއަރާފަ އެވެ.

އެ ރިޕޯޓާ ގުޅިގެން އޭސީސީން ނެރުނު ބަޔާނެއްގައި ބުނެފައިވަނީ އޮޑިޓުގައި ފާހަގަކޮށްފައިވާ ގިނަ މައްސަލަތައް މިހާރު ވެސް އެ ކޮމިޝަނުން ބަލަމުންދާ ކަމަށެވެ. އެގޮތުން ފެނަކައިގެ 161 މައްސަލައެއް އެ ކޮމިޝަނުން ތަހުގީގުކުރަމުންދާއިރު، އޭގެތެރެއިން 13 މައްސަލައެއްގަ ޕީޖީ އޮފީހާ އެކު ޑިއުޓީ ޕްރޮސެކިއުޝަންގެ މަރުހަލާ ފަށާފައިވާ ކަމަށް ވެސް ބުނެފައިވެ އެވެ.

އޭސީސީން ބުނީ، މިހާތަނަށް ފެނަކައާ ގުޅޭ މައްސަލަތައް ތަހުގީގުކޮށް، އެ މައްސަލަތަކާ ގުޅިގެން 21،458،289.86 ރުފިޔާ އަނބުރާ ހޯދުމަށް އެ ކުންފުންޏަށް އަންގާފައިވާ ކަމަށެވެ.

ފެނަކައާ ގުޅޭ އެކި މައްސަލަތަކުގައި 96 ކަމެއް އިސްލާހުކުރުމަށް ކޮމިޝަނުން އަންގާފައިވާ ކަމަށް ވެސް ބަޔާނުގައި ވެ އެވެ. އޭގެ ތެރޭގައި ހިމެނެނީ، ކުންފުނި ހިންގުމާ ގުޅޭ ކަންކަން ކުރިއަށް ގެންދާ ގޮތުގެ 49 ކަމަކާއި ކުންފުނީގެ ސިޔާސަތުތަކާ ގުޅޭ 26 ކަމަކާއި ކޮރަޕްޝަން ގެ އަމަލުތަކުގެ ސަބަބުން ކުންފުންޏަށް ގެއްލިފައިވާ ފައިސާ އަނބުރާ ހޯދުމާ ގުޅޭ 10 ކަމަކާއި ކުންފުނިން ބަލައި ތަހުގީގުކުރުމަށް 8 ކަމެކެވެ.

އޭސީސީން ވަނީ ފެނަކައަަށް ނިސްބަތްވާ 9 މައްސަލައެއްގަ އެކި ފަރާތްތަކަށް ދައުވާ ކޮށްދިނުމަށް އެދި ފޮނުވާފައިވާކަން ފާހަގަކޮށް ބައެއް މައްސަލަތަކުގައި ދައުވާކުރެވި ހުކުމްކޮށްފައިވާ ކަމަށް ވެސް ބުނެފަ އެވެ.

އޭސީސީގެ ބަޔާނުގައި ފާހަގަކުރި ގޮތަށ،ް ރަސްމީ ހައިސިއްޔަތު ނަހަމަގޮތުގަ ބޭނުން ކުރުމުގެ ކުށުގެ ދައުވާ ސާބިތުވެ، އެ ކުންފުނީގެ އޭރުގެ މެނޭޖިން ޑިރެކްޓަރު އަހުމަދު ސައީދު ގެންދަވަނީ ޖަލު ހުކުމެއް ތަންފީޒުކުރައްވަމުން ނެވެ.

ސައީދުގެ މައްޗަށް އިތުރު މައްސަލައެއްގައި ވެސް ދައުލަތުން ވަނީ ދައުވާ އުފުލާފަ އެވެ.