50 ބުރީގެ އިމާރާތެއް ބިނާކުރުމަށްވުރެ ގައުމާއި އިސްލާމް ދީން ދެކެ ލޯބިވާ ހުނަރުވެރި ޒުވާނެއް ބިނާކުރުން މާ މުހިއްމު ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެ އެވެ.

ރައީސް މިފަދައިން ވިދާޅުވީ ތަމްރީނާއި ތަރުބިއްޔަތު ލިބިފައިވާ ހަރުދަނާ ޒުވާން ޖީލެއް ބިނާކުރުމުގެ މަގްސަދުގައި ސަރުކާރުން ކުރިއަށް ގެންދާ ގައުމީ ހިދުމަތުގެ ޕްރޮގްރާމް އިފްތިތާހުކުރުމަށް ޅ. މާފިލާފުށީގަ މިއަދު ބޭއްވި ރަސްމިއްޔާތުގަ ވާހަކަދައްކަވަމުން ނެވެ. އެ ރަސްމިއްޔާތުގައި ވާހަކަފުޅު ދައްކަވަމުން ރައީސް ވިދާޅުވީ، ފުރިހަމަ ތަރައްގީ ހާސިލުކުރެވޭނީ ހަރުދަނާ، ޒުވާން ޖީލެއް ބިނާކޮށްގެން ކަމަށެވެ.

"50 ބުރީގެ އިމާރާތެއް، އިމާރާތް ކުރުމަށްވުރެ ވެސް، ގައުމުދެކެ ލޯބިވާ، އިސްލާމް ދީން ދެކެ ލޯބިވާ ފަޚުރުވެރި ހުނަރުވެރި ޒުވާނެއް ބިނާކުރުމަކީ މާ މުހިއްމުކަމެއްގެ ގޮތުގައި އަޅުގަނޑު ގަބޫލުކުރަން. މިއީ ގައުމު ބިނާކުރުމުގައި ވަރަށް ތާރީހީ ވަރަށް މުހިންމު ސަފްހާއެއް" ރައީސް ވިދާޅުވި އެވެ.

ތަމްރީނުގެ ބައިވެރިންނާ މުހާތަބުކުރައްވަމުން ރައީސް ވަނީ ނެޝަނަލް ސާވިސް އަކީ މުސްތަގުބަލު އުޖާލާކޮށް، އުފާފާގަތިކަން ކަށަވަރުކުރުމަށް ލިބުނު ފުރުސަތެއްގެ ގޮތުގައި ބަލައިގަނެގެން ކުރިއަށްދިއުމަށް އެދިވަޑައިގެންފަ އެވެ. އަދި ތަމްރީނު ނިމޭއިރު އުފެދިގެންދާނީ، އުޅުންހުރި، ގައުމީ އަދި ދީނީ ލޯބި އަށަގެންފައިވާ، ބާރުވެރި ޒުވާނުންތަކެއް ކަމަށް އެމަނިކުފާނު ވިދާޅުވި އެވެ.

ނެޝަނަލް ސާވިސް މިއަދު އިފްތިތާހު ކުރެވިގެންދިއުން ރައީސް ސިފަކުރެއްވީ ތާރީހީ މަސައްކަތެއްގެ ގޮތުގަ އެވެ. ބައިވެރިންނާ މެދު ސަރުކާރުން ރަނގަޅަށް އަމަލުކުރާނެ ކަމުގެ ޔަގީންކަން ވެސް އެމަނިކުފާނު ދެއްވި އެވެ.

343 ބައިވެރިންނާއެކު ނެޝަނަލް ސާވިސްގެ ތަމްރީނުތައް މިއަދު ފަށާފައިވާއިރު އެއީ ދިވެހި ގައުމިއްޔަތަށް ލޯބިކުރާ، ޒިންމާދާރު، ޖިސްމާނީ، ރޫޙާނީ އަދި ނަފުސާނީ ގޮތުން ދުޅަހެޔޮ ދިވެހި ރައްޔިތެއް ބިނާކުރުުގެ ގޮތުން ސަރުކާރުން ކުރިއަށް ގެންދާ ޕްރޮގްރާމެކެވެ. މި ތަމްރީނުގަ ދިވެހި ގައުމިއްޔަތު، ޒިންމާދާރު ރައްޔިތުކަން، ދިނީ ތައުލީމު، ލީޑަޝިޕް އަދި ބަހުގެ ޕްރޮފިޝަންސީ އުނގަންނައިދީ، ކަސްރަތާއި ހަށިހެޔޮކަމާއި، ހެވިކަމުގެ ތަމްރީނުތައް ހިމެނެ އެވެ. އަދި ފަސްޓް އެއިޑް، ފަޔަރ ފައިޓިން އަދި ސެލްފް ޑިފެންސް ވެސް ދަރިވަރުންނަށް ދަސްކޮށްދޭނެ އެވެ.