ދެމެހެއްޓެނިވި ފަތުރުވެރިކަން ކުރިއެރުވުމަށް ގުޅިގެން މަސައްކަތްކުރުމަށް ޓޫރިޒަމް މިނިސްޓަރ ތޯރިގް އިބްރާހީމް ގޮވާލައްވައިފި އެވެ.
މިނިސްޓަރު މިހެން ވިދާޅުވީ ބައިނަލްއަގުވާމީ ފަތުރުވެރިކަމުގެ ދުވަހާ ގުޅުވައިގެން ފޮނުއްވި ވީޑިއޯ މެސެޖެއްގަ އެވެ.
މި އަހަރުގެ ދުނިޔޭގެ ފަތުރުވެރިކަމުގެ ދުވަހުގެ ތީމަކީ ‘ފަތުރުވެރިކަމާއި ދެމެހެއްޓެނިވި ބަދަލުތައް’ ކަން ފާހަގަކުރައްވައި ތޯރިގް ވިދާޅުވީ މި ތީމުން ހަނދާންކޮށް ދެނީ، ފަތުރުވެރިކަމަކީ އިޖުތިމާއީ އަދި އިގްތިސޯދީ ކުރިއެރުމާއި ދެމެހެއްޓެނިވި ތަރައްގީއަށް ވަރަށް މުހިންމު ދައުރެއް އަދާކުރެވޭނެ ކަމެއް ކަމަށެވެ. ތޯރިގް ފާހަގަކުރެއްވި ގޮތުގައި، ރާއްޖޭގެ ފަތުރުވެރިކަމުގެ ދާއިރާގައި މަސައްކަތްކުރާ އެންމެހާ ފަރާތްތަކުގެ މަސައްކަތުގެ ސަބަބުން މިއަދު ރާއްޖެއަކީ ދުނިޔޭގެ ފެންވަރުގައި ފާހަގަކުރެވޭ ފަތުރުވެރި މަންޒިލަކަށް ވަނީ ވެފަ އެވެ.
ފަތުރުވެރިކަމަކީ އިގްތިސާދީ އަދި އިޖުތިމާއީ ތަރައްގީގަ މުހިންމު ދައުރެއް އަދާކުރާ ދާއިރާއެއްކަން ވެސް އޭނާ ފާހަގަކުރެއްވި އެވެ. އެކަމަށްޓަކައި ދައުލަތާއި، އަމިއްލަ ކުންފުނިތަކާއި، ރައްޔިތުންގެ ބައިވެރިވުން ވަރަށް ބޮޑަށް ބޭނުންވާކަމަށާއި، ދެމެހެއްޓެނިވި ގޮތަކަށް ފަތުރުވެރިކަން ކުރިއެރުވުމަކީ ރާއްޖޭގެ އާދަކާދަތަކާއި ތިމާވެށި ހިމާޔަތްކުރުމަށް ވެސް މަގުފަހިކޮށްދޭނެ ކަމެއް ކަމަށް ތޯރިގް ވިދާޅުވި އެވެ.
