ސަރުކާރުގެ އަމާޒަކީ ރަށްރަށުގެ މުއްސަނދިކަން ދައްކުވައިދޭ ފަތުރުވެރިކަމުގެ މޮޑެލެއް ބިނާކުރުންކަމަށް ރައީސުލްޖުމްހޫރިއްޔާ ޑރ މުހައްމަދު މުއިއްޒު ވިދާޅުވެއްޖެއެވެ.

ރައީސް މިފަދައިން ވިދާޅުވީ، ދުނިޔޭގެ ފަތުރުވެރިކަމުގެ ދުވަހާ ގުޅުވައި، 'އެކްސް’ގައި މިއަދު ކުރެއްވި ޕޯސްޓެއްގަ އެވެ. ރައީސް ވިދާޅުވީ، ސަރުކާރުގެ އަމާޒަކީ ރާއްޖޭގެ ހުރިހާ ރަށްތަކަކަށް އެ ސިނާއަތުގެ ތެރެއިން ފުރުސަތުތައް ފަހިކޮށްދީ، ދެމެހެއްޓެނިވި ތަރައްގީއަށް މަގުކޮށައިދިނުންކަމަށެވެ.

ރައީސް އިތުރަށް ވިދާޅުވީ، ބޭރު ދުނިޔޭގެ އެކި ކަންކޮޅުތަކުން ދިވެހީންގެ މެހެމާންދާރީގެ އަސާސްތައް ބަލައިގެންފައިވާ ކަމަށާއި މި ސަރުކާރުން ހުރިހާ ރައްޔިތުން ޝާމިލުވާ ފަދަ އިގްތިސާދީ ތަރައްގީގެ މޮޑެލެއް ކުރިއަރުވަން ބޭނުންފުޅުވާ ކަމަށެވެ. އަދި އެކަމަށްޓަކައި ހުރިހާ އަތޮޅެއްގެ އާބާދީތަކަށް ފުރުސަތުތައް ފަހިކޮށް، ފުޅާކުރަން މަސައްކަތްކުރެއްވުމުގައި ދެމިހުންނަވާނެ ވެސް ވިދާޅުވި އެވެ.

ފަތުރުވެރިކަމުގެ ދުވަސް ބައިނަލްއަގުވާމީގޮތުން އެންމެ ފުރަތަމަ ފާހަގަކުރަން ފަށާފައިވަނީ 1980 ވަނަ އަހަރުއެވެ. މިފަދަ ދުވަހެއް ބައިނަލްއަގުވާމީ ފެންވަރުގައި ފާހަގަކުރުމުގެ މައިގަނޑު ބޭނުމަކީ ފަތުރުވެރިކަމުގެ ސިނާއަތުން ހޯދަމުންދާ ކުރިއެރުންތައް ފާހަގަކޮށް، އެ ސިނާއަތް ކުރިއެރުވުމަށް ހުރި ފުރުސަތުތައް ދެނެގަތުމަށް ބާރުއަޅައި، ފަތުރުވެރިކަމާއި އިޖްތިމާއީ، ސަގާފީ، ސިޔާސީ އަދި އިގްތިސާދީ ކަންކަމާއި އޮންނަ ގުޅުންތަކަށް ހޭލުންތެރިކަން އިތުރުކުރު މެވެ.