އެސެޓް ރިކަވަރީ ބިލަށް އަމަލުކުރަން ފެށުމާއެކު މީގެ ކުރިން ބޮޑެތި ވައްކަންތައް ކޮށްފައިވާ އެންމެންގެ ފަހަތުން، ސަރުކާރުގެ ކަމާ ބެހޭ އިދާރާތަކުން މަސައްކަޔް ކުރާނެ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެ އެވެ.
އެމަނިކުފާނު މިފަދައިން ވިދާޅުވީ، ހުކުރު ދުވަހުގެ ރޭ ކޮޅުމަޑުލު ތިމަރަފުށީގެ ރައްޔިތުންނާ ބައްދަލުކުރައްވައި ދެއްކެވި ވާހަކަފުޅުގައެވެ.
ރައީސް ވިދާޅުވީ، އެސެޓް ރިކަވަރީ ބިލެއް ހުށަހެޅުއްވުމުގެ މައިގަނޑު މަގްސަދަކީ، މިދިޔަ ދުވަސްތަކުގައި ގައުމުގައި ހިންގާފައިވާ ކޮރަޕްޝަނާއި ވައްކަމުގެ ބޮޑެތި މައްސަލަތައް ބަލައި ނިމޭއިރު، އެ ވައްކަންތަކުގައި ޝާމިލުވާ ފަރާތްތަކުގެ އަތުން ބަދަލު ނެގޭނެ ގޮތެއް ނެތުމުން، އެކަން ބަދަލުކުރެއްވުން ކަމަށެވެ. އަދި، ރައްޔިތުންގެ މަޖިލީހުން އެ ބިލު ފާސްކޮށް ތަސްދީގުކުރަވަން ފޮނުވާ ދުވަހު އެ ބިލު އަމަލުކުރަން ފަށާނެ ކަމަށް ރައީސް ވިދާޅުވިއެވެ.
ކޮރަޕްޝަން ނައްތާލުމަށް މި ސަރުކާރު ވަރަށް ވަރުގަދައަށް ތައްޔާރުވެފަައިވާކަން ފާހަގަކުރައްވާ ރައީސް ވިދާޅުވީ ސަރުކާރުގެ ޑިޖިޓަލް ޓްރާސްފޮމޭޝަންގެ މަޝްރޫއު ކަމަށްވާ "މޯލްޑިވްސް 2.0″ އަކީ ވެސް ކޮރަޕްޝަން ނައްތާލުމުގެ ބޭނުމުގައި ނިޒާމަށް ގެންނަ ބޮޑު ބަދަލެއް ކަމަށެވެ. މިއީ ކުރިއަށް އޮތްތަނުގައި ކޮރަޕްޝަން ނައްތާލުމަށް ހިންގާ އެންމެ ބޮޑު މަޝްރޫއުކަމަށާއި ވެރިކަން ހިންގުމުގެ ނިޒާމުގެ ކަންކަން ޑިޖިޓަލައިޒް ކުރައްވަނީވެސް ކޮރަޕްޝަން ނައްތާލުމަށް ކަމަށް އެމަނިކުފާނު ވިދާޅުވިއެވެ. އެއީ އަތުން ހިފޭނެ އެއްޗެއް ނޫން ކަމަށް އެމަނިކުފާނު ވިދާޅުވި އެވެ.
ޖުޑިޝަރީއާއި މިނިވަން މުއައްސަސާތަކަށް ސަރުކާރުން ނުފޫޒު ނުފޯރުވާނެކަމުގެ ޔަގީންކަން ދެއްވާކަން ފާހަގަކުރައްވަމުން ރައީސް ވަނީ އެއީ ކޮންމެހެން ކުރަންޖެހޭ ކަމެއްކަމަށް ގަބޫލުފުޅު ނުކުރައްވާ ކަމަށް ވިދާޅުވެފަ އެވެ. ސަރުކާރުން ކުރާނެހާ ކަމަކީ، ޖުޑިޝަރީއާއި މިނިވަން މުއައްސަސާތަކުގެ ޒިންމާތައް އަދާކުރުމަށް މަގުފަހިކޮށްދެއްވުން ކަމަށް އެމަނިކުފާނު ވިދާޅުވި އެވެ. އަދި ދައުލަތުގެ ވެރިކަން ހިންގާ އެންމެ އިސްވެރިޔާގެ ހައިސިއްޔަތުން އަދާކުރަންޖެހޭ ޒިންމާތަކުގެ ތެރެއިން، މަސައްކަތްތަކުގެ ދުވެލި ހަލުވިކުުރަން އެންޓި ކޮރަޕްޝަން ކޮމިޝަނާއި، ޕްރޮސެކިއުޓާ ޖެނެރަލްގެ އޮފީހުގައި ދަންނަވާނެ ކަމަށް ވެސް ރައީސުލްޖުމްހޫރިއްޔާ ވިދާޅުވިއެވެ.
ރައީސްގެ ވާހަކަފުޅު ނިންމަވާލެއްވީ ކޮރަޕްޝަން ނައްތާލުމަށްޓަކައި ކުރަންޖެހިވަޑައިގެންނެވި ކޮންމެ ކަމެއްވެސް ކުރައްވާނެކަމާއި އެކަމުގައި ވަކި މީހަކަށް ނުބައްލަވާނެ ކަމަށް ވިދާޅުވަމުން ނެވެ. އަދި އެއީ ކޮންމެ މީހަކު ކަމަށް ވިޔަސް، އަމަލުކުރައްވާނީ އެކަމެއްގައި އޮންނަ އެންމެ އަދުލުވެރި ގޮތަށް ކަމަށާ، ސިޔާސީ މަސައްކަތްތައް ކުރުމަށް ރާއްޖޭގައި މިހާރު ފުރިހަމަ މިނިވަންކަން ދެވިފައި އޮތް ކަމަށް ވިދާޅުވަމުން ނެވެ.
