ވަންދޫގެ އިހުތިސޯސަށް އިތުރުކުރެވުނު ތ. ކަކޮޅަހުން ވަންދޫއަށް ލިބޭ ފައިދާތައް އިތުރުކުރެވޭނެ ގޮތްތައް ބައްލަވާނެ ކަމަށް ރައިސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެ އެވެ.
އެމަނިކުފާނު މިފަދައިން ވިދާޅުވީ، ރާއްޖޭގެ 4 އަތޮޅަކަށް މިހާރު ކުރައްވަމުން ގެންދަވާ ދަތުރުފުޅުގެ ތެރެއިން ތ. ވަންދޫއަށް ވަޑައިގެން އެ ރަށުގެ ރައްޔިތުންނާ ބައްދަލުކުރައްވައި ދެއްކެވި ވާހަކަފުޅުގަ އެވެ.
ކަކޮޅަހަކީ އެ ވަންދޫގެ އިގްތިސޯދީ ފުދުންތެރިކަން އިތުރުކުރުމަށް ކައުންސިލާ ހަވާލުކުރެވުނު ރަށެއްކަން ފާހަގަކުރައްވަމުން ރައީސް ވިދާޅުވީ އެ ރަށުގެ އެއްބަސްވުމާ އެއްގޮތަށް އަމަލުކުރާ ނަމަ ރައްޔިތުންނަށް ގިނަ ފައިދާތަކެއް ލިބިގެންދާނެ ކަމަށެވެ.
"އަދި އަޅުގަނޑުމެން ބަލާނަން މި އެގްރިމެންޓުން އިތުރަށް ތަރައްގީކޮށް ނޫނީ މިއަށް އިތުރު ލުއި ހެޔޮ ބަދަލުތައް ގެނެވެސް އޮތްތޯ ބަލައި އިތުރު ފައިދާތައް ވެސް އެ ރަށުގެ ބޭނުންކޮށްގެން ހިފޭނެ ގޮތްތައް އޮތްތޯ އަޅުގަނޑުމެން ބަލާނަން. " ރައީސް ވިދާޅުވި އެވެ.
އެގޮތުން އެ ރަށުގެ އެކި ފަރާތްތަކަށް ކުއްޔަށް ދެވޭނެ ޖާގަ އިތުރުކުރުން ފަދަ ކަންކަން ބަލައި، އެއްބަސްވުމަށް އިތުރު ހެޔޮ ބަދަލުތަކެއް ގެނައުމަށް މަސައްކަތް ކުރައްވާނެ ކަމަށް ވިދާޅުވި އެވެ.
މީގެއިތުރުން، އެ ރަށުގެ މިސްކިތް ވެސް އަންނަ އަހަރުގެ ފެބްރުއަރީ މަހު ނިމޭނެ ކަމަށް ގަބޫލުކުރައްވާ ކަމަށާއި، އެ ރަށުގެ ފުޓްސެލް ދަނޑުގެ މަސައްކަތްތައް ވެސް މިއަހަރުގެ ނިޔަލަށް ނިންމުމަށް އުއްމީދުކުރައްވާ ކަމަށް ވެސް ރައީސް ވިދާޅުވި އެވެ. އަދި ސިއްހީ މަރުކަޒުގެ އަމަލީ މަސައްކަތާއި ސްކޫލުގެ އާ އިމާރާތުގެ އަމަލީ މަސައްކަތް ވެސް މިއަހަރު ފެށޭނެ ކަމަށް އެމަނިކުފާނު ވިދާޅުވި އެވެ.
