މ. ރަތްމަންދޫގެ ރައްޔިތުން އެހެން ރަށަކަށް ބަދަލުކޮށްދިނުމަށް އެ ރަށުގެ ރައްޔިތުން އެދިއްޖެ އެެ.
ރަތްމަންދޫގެ ރައްޔިތުން އެހެން ރަށަކަށް ބަދަލުވުމަށް އެދުނީ، ރާއްޖޭގެ ހަތަރު އަތޮޅަކަށް ރައިސުލްޖުމްހޫރިއްޔާ ޑރ. މުހައްމަދު މުއިއްޒު ކުރައްވާ ދަތުރުފުޅުގެ ތެރެއިން އެމަނިކުފާނު އެ ރަށަށް ވަޑައިގެންނެވުމުން ނެވެ.
ރަށު ކައުންސިލާއި، މުއައްސަސާތަކުގެ ވެރިންގެ އިތުރުން ރައްޔިތުންނާ އެކު ބޭއްވި ބައްދަލުވުމުގައި ރަށަށް ބޭނުންވާ އާއްމު އިޖުތިމާއީ ތަރައްގީއަށް ބޭނުންވެފައިވާ ކަންކަން ހިއްސާކޮށްފައިވެ އެވެ.
މި ބައްދަލުވުމުގައި ރަތްމަންދޫގެ ބައެއް ރައްޔިތުން ވަނީ އެހެން ރަށަކަށް އާބާދީ ބަދަލުވުމަށް އެދޭކަން ހާމަކޮށްފަ އެވެ. ރައްޔިތުންގެ މި ހުށައެޅުމަށް ޖަވާބުދެއްވަމުން ރައީސް ވިދާޅުވީ، އާބާދީއާއި ތަރައްގީއެއް ފަސްކުރުމަކީ ހަރަދު ކުޑަ ފައިދާކުރަނިވި ހަރުދަނާ ސިޔާސަތެއް ކަމަށެވެ. ނަމަވެސް އެއީ އެކަމަށް ރައްޔިތުން ބޭނުންވުމާއި، ބަދަލުވާން ގަސްދުކުރާ ރަށެއްގެ ރައްޔިތުން އެކަމަށް ބޭނުންވުމާއި، އަދިވެސް އެހެނިހެން ކަންކަމާއި ގުޅިފައިވާ ކަމެއްކަން އެމަނިކުފާނު ފާހަގަކުރެއްވި އެވެ.
ސަރުކާރުގެ އެއްފަސްކުރުމުގެ ސިޔާސަތުގެ ދަށުން އެކަމުގައި ގޮތެއް ނިންމާނީ، ރައީސް ވިދާޅުވި ގޮތުގައި ރައްޔިތުންގެ ހިޔާލު ހޯދައިގެން ނެވެ. އަދި އެކަމަކީ އެ ރަށުގެ އާބާދީގެ އެންމެ މަދުވެގެން 80 އިންސައްތަ ރައްޔިތުން އެދޭ ގޮތަށް ވާންޖެހޭނެ ކަމަށް ވެސް ވިދާޅުވި އެވެ.
އެގޮތުން ރައްޔިތުން އެހެން ރަށަކަށް ބަދަލުވާން ނިންމައިފި ނަމަ، ބަދަލުވާ ރަށެއްގައި މިހާރު ރަތްމަންދޫގައި ދިރިއުޅޭ ރައްޔިތުންނަށް ހައުސިން މަޝްރޫއެއް ކުރިއަށް ގެންގޮސްދެވާނެ ކަމަށް ވިދާޅުވި އެވެ.
މިއަދުގެ ބައްދަލުވުމުގައި ރަތްމަންދޫއިން އެހެން ރަށަކަށް ބަދަލުވާން ބޭނުންވާ ފަރާތްތަކާއި، ރަށުން ބަދަލުވާން ބޭނުންނުވާ ފަރާތްތަކުން ވަނީ އެމީހުންގެ ޚިޔާލު ރައީސުލްޖުމްހޫރިއްޔާއާ ހިއްސާކުރައްވާފައެވެ.