މ. މުލަކުގެ ރައްޔިތުންނަށް ދިމާވެފައިވާ ބޯހިޔާވަހިކަމުގެ މައްސަލައަށް ހައްލެއް ހޯދައިދެއްވާނެ ކަމަށް ރައިސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެ އެވެ.

ރާއްޖޭގެ 4 އަތޮޅަކަށް ރައިސުލްޖުމްހޫރިއްޔާ ޑރ. މުހައްމަދު މުއިއްޒު ކުރައްވަމުން ގެންދަވާ ދަތުރުފުުޅުގެ ތެރެއިން މ. މުލަކަށް ވަޑައިގެން، އެ ރަށުގެ ރައްޔިތުންނާ ވާހަކަދައްކަވަމުން ރައީސް ވިދާޅުވީ މި އަހަރު ތެރޭ، 50 ހައުސިން ޔުނިޓުގެ ޢަމަލީ މަސައްކަތް ފައްޓަވާނޭކަން، އެމަނިކުފާނު އިޢުލާންކުރެއްވިއެވެ.

އަދި ބާރު ދުވެލީގައި ބަނދަރުގެ މަސައްކަތް ނިންމައި، ރަށްގިރުމުގެ މައްސަލައަށް ވެސް ހައްލު ހޯއްދަވައިދެއްވާނޭ ކަމަށެވެ.

އެމަނިކުފާނު ވިދާޅުވީ ރަށުގެ މަގުހެދުމުގެ މަޝްރޫއާއި ފިޓްނަސް އެންޑް ރިކްރިއޭޝަން ސެންޓަރުގެ މަޝްރޫއު، ގިނަވެގެން 4 މަސްދުވަހުގެ ތެރޭގައި ނިމޭނޭކަމަށެވެ.

މީގެއިތުރުން، މުލަކު ސިއްހީ މަރުކަޒު ހޮސްޕިޓަލަކަށް ބަދަލުކުރުމުގެ މަސައްކަތް މިއަދު ފެށިގެންދިޔައިރު، އެއީ ސަރަހައްދީ ފެންވަރެއްގައި ލުއި ފަސޭހަތަކެއް ލިބިގެންދާނޭ މަސައްކަތެއްކަން އެމަނިކުފާނު ފާހަގަކުރެއްވިއެވެ. މަގު ހެދުމުގެ މަޝްރޫއާއި ފިޓްނަސް އެންޑް ރިކްރިއޭޝަން ސެންޓަރުގެ މަޝްރޫއު، ގިނަވެގެން 4 މަސްދުވަހުގެ ތެރޭގައި ނިމޭނޭކަމުގެ ޔަގީންކަންވެސް އެމަނިކުފާނު ދެއްވި އެވެ.

އަންނަ އަހަރުގެ މާރިޗުގެ ކުރިން ރަށުގެ އިރުމަތީ ޖެޓީގެ އަމަލީ މަސައްކަތް ފަށައި ދިރާސީ އާ އަހަރަށް ސްކޫލްގެ މަސައްކަތް ވެސް ފުރިހަމަކޮށްދެއްވާނޭ ކަމަށް އެމަނިކުފާނު ވިދާޅުވި އެވެ. ފުލުހުންނަށް ވެހިކަލެއް ނުލިބި 14 ވަރަކަށް އަހަރު ވެފައިވާ މައްސަލައަށް އަންނަ އޮކްޓޯބަރު މަހު، ނިމުމެއް ގެނެސްދެއްވާނޭ ކަމަށް ވެސް އެމަނިކުފާނު ވިދާޅުވި އެވެ.