ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ނިލަންދެއަތޮޅުގެ ރަށްރަށަށް މިހާރު ކުރައްވަމުން ގެންދަވާ ދަތުރުފުޅުގައި އެއަތޮޅު ދަރަނބޫދޫއަށް ވަޑައިގެން އެ ރަށުގައި ވެސް ގިނަ މަޝްރޫއުތަކެއް ފައްޓަވައިދެއްވައިފިއެވެ.
އެރަށު ރައްޔިތުން ދެންނެވި ހޫނު މަރުހަބާއަށް ފަހު ރައީސް ވަނީ، ދަރަނބޫދޫ ސިއްޙީ މަރުކަޒުގެ އަލަށް އިތުރު ކުރާ އިމާރާތުގެ އަމަލީ މަސަތްކަތް ފައްޓަވާދެއްވާފަ އެވެ.
މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގް ކޮމްޕެނީ އެމްޓީސީސީއާ ހަވާލުކޮށްފައިވާ މި ސިއްޙީ މަރުކަޒުގެ އަލަށް އިތުރު ކުރާ އިމާރާތުގެ ބިންގާ އަޅުއްވައިދެއްވީ ޞިއްޙީ ވަޒީރު ޢަބްދުﷲ ނާޒިމް އިބްރާހީމެވެ. އަރިހުގައި ފ. ނިލަންދޫ ދާއިރާގެ މެމްބަރު ފާތިމަތު ސައުދާވެސް ބައިވެރި ވަޑައިގަތެވެ.
މީގެއިތުރުން، ދަރަނބޫދޫގެ ފިޓްނެސް އެންޑް ރެކްރިއޭޝަން ސެންޓަރްގެ ބިންގާވެސް އަޅާފައިވެ އެވެ. ފިޓްނެސް އެންޑް ރެކްރިއޭޝަން ސެންޓަރްގެ ބިންގާ އަޅުއްވައިދެއްވީ މިނިސްޓަރ އޮފް ސްޕޯޓްސް، ފިޓްނަސް އެންޑް ރެކްރިއޭޝަން އަބްދުﷲ ރާފިއު އާއި ދާއިރާގެ މެމްބަރު ފާތިމަތު ސައުދާ އަދި ދަރަނބޫދޫ ކައުންސިލުގެ ރައީސް އެވެ.
ފިޓްނެސް އެންޑް ރެކްރިއޭޝަން ސެންޓަރްގެ ބިންގާ އެޅުމުގެ ރަސްމިއްޔާތުގައި ބައިވެރިވުމަށް ފަހު ރައީސް ވަނީ ދަރަނބޫދޫގެ ބީއެމްއެލް އޭޓީއެމްގެ ޚިދުމަތް ފަށްޓަވައިދެއްވާފަ އެވެ.
އޭޓީއެމްގެ ޚިދުމަތް ފަށްޓަވާދެއްވުމަށްފަހު ރައީސް ވަނީ ހަނދާނީ ބޭންކު ކާޑެއް ރަށު ކައުންސިލާއި ހަވާލުކުރައްވާފަ އެވެ.
ދަރަނބޫދޫ ބީއެމްއެލް އޭޓީއެމުން އަމިއްލަ ފަރުދުންނާއި ވިޔަފާރިތަކަށް 24 ގަޑިއިރު ފައިސާ ނެގުމާއި ޖަމާކުރުމުގެ އިތުރުން، ބިލަށް ފައިސާ ދެއްކުމާއި ޓްރާންސްފަރކުރުމުގެ ޚިދުމަތް ލިބޭނެކަމަށް ބީއެމްއެލުން ވިދާޅުވެ އެވެ.
