އައްޑޫ ސިޓީގެ އިދާރީ ދާއިރާގެ ކަންކަން ކަނޑައެޅުމުގައި ރައްޔިތުންގެ ޚިޔާލު ހޯދުމަށް އާއްމު ވޯޓެއް މިއަހަރު ނެގުމަށް ނިންމާފައިވާކަން ހާމަކޮށްފި އެވެ.
"ރައްޔިތުންނާ އެކު" ސިލްސިލާ ޕޮޑްކާސްޓްގެ 9 ވަނަ އެޕިސޯޑްގައި ވާހަކަފުޅު ދައްކަވަމުން ރައީސް ވަނީ، ދާދިފަހުން ތަސްދީގުކުރެވުނު ރައްޔިތުންގެ ޚިޔާލު ހޯދުމުގެ އާއްމު ވޯޓު ނެގުމާ ގުޅޭ ގާނޫނާ ގުޅޭގޮތުން ވާހަކަދައްކަވާފަ އެވެ. އައްޑޫގެ ރައްޔިތުންގެ މެދުގައި މިފަދަ ވޯޓެއް ނެގުމަށް މަގުފަހިވަނީ އެ ގާނޫނުގެ ދަށުން ނެވެ.
ރައީސް ވިދާޅުވީ ރިޔާސީ އިންތިހާބުގެ ތެރޭގައި އައްޑޫ ސިޓީގެ ރައްޔިތުންނާ ބައްދަލުކުރެއްވިއިރު، ސިޓީއެއްގެ ގޮތުގައި އައްޑޫ އުފެދިފައި އޮތް އޮތުމާ ގުޅިގެން ބައެއް ރައްޔިތުންގެ ކަންބޮޑުވުންތައް އެމަނިކުފާނާ ހިއްސާކުރި ކަމަށެވެ. އެކަމުގައި، ރައްޔިތުން އެދިވަޑައިގަންނަވާ ފަދަ ދާއިމީ ހައްލެއް ހޯއްދަވައިދެއްވާނެކަމަށް އެމަނިކުފާނު އޭރު ވައުދުވެސް ވެވަޑައިގެންނެވި އެވެ. މިކަން ފާހަގަކުރައްވަމުން ރައީސް ވިދާޅުވީ، އައްޑޫގެ ލާމަރުކަޒީ ނިޒާމު އޮންނާނެ ގޮތް ކަނޑައަޅުއްވާނީ އެ ސިޓީގެ ރައްޔިތުން ކަމަށެވެ.
މި އަހަރުގެ އޮކްޓޯބަރު މަހު ކުރިއަށް ގެންދިއުމަށް ހަމަޖެހިފައިވާ މި ވޯޓަކީ ރައީސް ވިދާޅުވި ގޮތުގައި އައްޑޫ ސިޓީގެ ކޮންމެ ރަށެއްގެ ނަމުގެ ކުރިއަށް "އައްޑޫ" އިތުރުކުރުމަށްފަހު، ކޮންމެ ރަށެއްގައި ވަކި ކައުންސިލެއް އުފައްދާނީތޯ، ނުވަތަ މިހާރު އޮތްގޮތަށް "އައްޑޫ ސިޓީ ކައުންސިލް"ގައި ރަށްތައް ތަމުސީލު ކުރާނީތޯ، ރައްޔިތުން ޚިޔާރު ކުރަން އައްޑޫ ރައްޔިތުންނަށް ހުޅުވާލެވޭ ވޯޓެއް ކަމަށެވެ.
މި ވޯޓަކީ ވަރަށް މުހިންމު، އަދި ތާރީޚީ ވޯޓެއް ކަމަށް އެމަނިކުފާނު ވިދާޅުވި އެވެ. އަދި، މިކަމުގެ ސަބަބުން ރައްޔިތުން އެދިވަޑައިގަންނަވާ ގޮތަށް ކަންކަން ކުރިއަށް ގެންދިއުމަށް ވަރަށް ބޮޑަށް ފުރުސަރު ލިބިގެންދާނެ ކަމަށް ވިދާޅުވި އެވެ.
