ހިއުމަން ރައިޓްސް ކޮމިޝަން އޮފް ދަ މޯލްޑިވްސް، (އާރުސީއެމް)ގެ ނައިބު ރައީސަކަށް އެ ކޮމިޝަނުގެ މެމްބަރަކަށް ހުންނެވި ޝަފީގު މަމްދޫހު އައްޔަނުކުރަން ރައްޔިތުންގެ މަޖިލީހުން މިއަދު ރުހުންދީފި އެވެ.
ދައުރުން ބޭރުން މިއަދުގެ މެންދުރު ފަހު ބޭއްވި ޖަލްސާގައި ނެގި ވޯޓުގައި ޝަފީގަށް ރުހުން ދިނުމަށް ފާސްވީ 67 މެމްބަރުންގެ ވޯޓާ އެކު އެވެ. 1 މެމްބަރަކު ދެކޮޅަށް ވޯޓު ދެއްވާފައިވެ އެވެ.
މި މަހުގެ 8 ވަނަ ދުވަހު އެޗްއާރުސީއެމްއަށް އައްޔަނުކުރެވުނު ޝަފީގު، އެ ކޮމިޝަންގެ ނައިބަކަށް އައްޔަނުކުރުމަށްޓަކައި ރައިސުލްޖުމްހޫރިއްޔާ ޑރ. މުހައްމަދު މުއިއްޒު އޭނާގެ ނަން މަޖިލީހަށް ފޮނުއްވީ މިއަދެވެ. މި މައްސަލަ ދިރާސާކުރުމަށް ފަހު މަޖިލީހުގެ ހިއުމަން ރައިޓްސް އެންޑް ޖެންޑާރ ކޮމިޓީން ވަނީ އޭނާ އަށް ރުހުން ދިނުމަށް ނިންމާފަ އެވެ.
އެގޮތަށް ނިންމެވީ، ކޮމިޓީގެ ބައްދަލުވުމަށް ވަޑައިގެންނެވި ހުރިހާ މެމްބަރުންގެ އަގުލަބިއްޔަތުން ނެވެ.
އޭނާ ވަނީ ލޯކަލް ގަވަމެންޓް އޮތޯރިޓީ (އެލްޖީއޭ)ގެ ސީއީއޯކަން ވެސް މީގެކުރިން ކުރައްވާފަ އެވެ.
