ރ. މާކުރަތުގައި ގާއިމުކުރާ ޕޮލިސް ޕޯސްޓު މަޝްރޫއުގެ މަސައްކަތް ކުރިއަށްދާ ކަމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) އިން ބުނެފި އެވެ.
އެ މަޝްރޫއުގެ އަދާހަމަ ހިއްސާކުރަމުން އެމްޓީސީސީން ބުނީ މިހާރު ކުރިއަށްދަނީ ރޫފިންގެ މަސައްކަތާއި ބޭރު ފާރުގެ ކޮންކްރީޓް މަސައްކަތްތައް ކަމަށެވެ.
މާކުރަތުގައި ޕޮލިސް ޕޯސްޓެއް ގާއިމުކުރުމުގެ އަމަލީ މަސައްކަތް ފެށުނީ މިއަހަރުގެ ޖެނުއަރީ މަހު ރައީސުލްޖުމްހޫރިއްޔާ ޑރ. މުހައްމަދު މުއިއްޒު އެ ރަށަށް ކުރެއްވި ދަތުރުފުޅުގެ ތެރެއިން ނެވެ. އެ ދަތުރުފުޅުގެ ތެރެއިން ޕޮލިސް ޕޯސްޓުގެ ބިންގާ އަޅުއްވައިދެއްވީ ހޯމްލޭންޑް ސެކިއުރިޓީ މިނިސްޓަރު އަލީ އިހުސާނާއި އޭރުގެ ޕޮލިސް ކޮމިޝަނަރު އަލީ ޝުޖާއު އެވެ.
މިއީ ރާއްޖޭގެ ހުރިހާ ރަށަކަށް ފުލުހުންގެ ހިދުމަތް ފޯރުކޮށްދިނުމަށް ސަރުކާރުގެ އަމާޒުގެ ދަށުން ހިންގާ މަޝްރޫއު އެކެވެ.
