ރާއްޖޭގައި އާންމުކޮށް ބޭނުންކުރާ ތަރުކާރީއާއި މޭވާގެ ލިސްޓު އަހަރުން އަހަރަށް ރިވިއުކުރަން ނިންމާފައިވާކަމަށް އިކޮނޮމިކް މިނިސްޓަރު މުހައްމަދު ސައީދު ވިދާޅުވެއްޖެއެވެ.
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ ރާއްޖޭގައި ޒަމާނުންސުރެ ކަނޑައަޅާފައިވާ ކާޑުގެ ބާވަތްތައްކަމުގައިވާ ހަނޑޫ، ހަކުރު، ފުށުގެ އިތުރުން، ރާއްޖެއަށް އެންމެ ގިނައިން އެތެރެކުރާ 10 ބާވަތުގެ މޭވާ އާއި 10 ބާވަތުގެ ތަރުކާރީ އަދި މުގު، ބިސް، އަލުވި އެސްޓީއޯއިން ގަނޑުކޮށް އެތެރެކޮށް، ރާއްޖޭގެ ބާޒާރުގައި ވިއްކަން ނިންމަވާފައެވެ.
އެކަމާ ގުޅޭގޮތުން ނޫސްވެރިންނާ ބައްދަލުކުރައްވައި ވާހަކަދައްކަވަމުން މިނިސްޓަރު ސައީދު ވިދާޅުވީ، ރާއްޖޭގައި އާންމުކޮށް ބޭނުންކުރާ ތަރުކާރީއާއި މޭވާގެ ލިސްޓު އަހަރަކު އެއް ފަހަރު ރިވިއުކުރާނެ ކަމަށެވެ. ރިވިއުކުރުމަށްފަހު އެތެރެކުރާނީ އެންމެ ގިނައިން ބޭނުންކުރާ 10 ބާވަތުގެ ކާބޯތަކެތީގެ ބާވަތްކަމަށް ވަޒީރު ވިދާޅުވިއެވެ.
ސައީދު ވިދާޅުވީ މީގެ ކުރިން އެއްވެސް ސަރުކާރަކުން ރާއްޖޭގައި އެންމެ ގިނައިން ބޭނުންކުރާ ކާބޯތަކެތީގެ ރިވިއުއެއް ހެދުމަށް އެކަށީގެންވާ މަސައްކަތްތަކެއްކޮށްފައިނުވާ ކަމަށެވެ. އޭގެ ސަބަބުން ހެޔޮ އަގުގައި އާންމުކޮށް ބޭނުންކުރާ ކާބޯތަކެތި ރައްޔިތުންނަށް ލިބުމުގައި ދަތިތައް ހުރިކަމަށް ވިދާޅުވިއެވެ. ނަމަވެސް ރައީސްގެ އަމާޒަކީ މިކަން ބަދަލުކޮށް، ހެޔޮ އަގެއްގައި ކާބޯތަކެތި ލިބޭނެކަން ޔަގީންކުރުންކަމަށް ސައީދު ވިދާޅުވިއެވެ.
ސައީދު ވިދާޅުވީ އަމާޒަކީ، އެސްޓީއޯއިން ގެންނަން ހަވާލުކުރި 23 ބާވަތުގެ ތަކެތި އަންނަ މަހުގެ 15އިން ފެށިގެން ރާއްޖޭން އަގުހެޔޮކޮށް ލިބެން ހުންނާނެކަން ކަށަވަރުކުރުން ކަމަށެވެ.
އަންނަ މަހުގެ 15 ވަނަ ދުވަހުގެ ކުރިންވެސް ރާއްޖޭގެ ބާޒާރުގައި އެތަކެތީގެ ބޮޑުވާ ނަމަ، އެސްޓީއޯއިން އެ ބާވަތެއް ރާއްޖެއަށް ގެނެސް، އާންމުންނަށް ހެޔޮ އަގުގައި ލިބޭނެ މަގު ފަހިކޮށްދޭނެ ކަމަށް ސައީދު ވިދާޅުވިއެވެ.