ތަރިކަ ދިރާސާކުރުމުގެ ދާއިރާއިން މަތީ ތަޢުލީމް ހާސިލްކުރުމަށް ސްކޮލަޝިޕްގެ ފުރުސަތު ހުޅުވާލައިފި އެވެ.

ދިވެހި ތަރިކަ ދިރާސާކުރުމުގެ ގައުމީ މަރުކަޒުން "ސިގްނޭޗަރ ސްކޮލަޝިޕް" ގެ ނަމުގައި ތަޢާރަފްކުރި މި ސްކޮލަރޝިޕަކީ ދިވެހިރާއްޖޭގެ އިސްލާމީ ޔުނިވަރސިޓީގެ މާސްޓަރސް ޑިގްރީއެއް ހާސިލުކުރެވޭ ގޮތަށް، ދިވެހި ތަރިކަ ދިރާސާކުރާ ޤައުމީ މަރުކަޒުން ސްޕޮންސަރކުރާ ފުރުސަތެކެވެ. މި ސްކޮޕަޝިޕްގައި ކިޔަވާ ދަރިވަރުންގެ ކޯސްފީ އެއްކޮށް ދެއްކުމަށް ހަމަޖެހިފައި ވަނީ ތަރިކަ ދިރާސާކުރުމުގެ ގައުމީ މަރުކަޒުންނެވެ.

މި ސްކޮލަރޝިޕްގައި ފުރިހަމަކުރަންޖެހޭނީ އިސްލާމީ ޔުނިވަރސިޓީން ކުރިއަށްގެންދާ މާސްޓަރ އިން ރިސަރޗް އެންޑް ޕަބްލިކޭޝަންސް ޕްރޮގުރާމެވެ. ސްކޮލަރޝިޕްގެ ދަށުން ހިންގާ ދިރާސީ މަސައްކަތްތަކުގެ މުއްދަތަކީ 2 އަހަރު ދުވަހެވެ. މި މަސައްކަތުގެ ތެރެއިން ކޮންމެ މަހަކު 2 ދުވަހު ދިވެހި ތަރިކަ ދިރާސާކުރާ ޤައުމީ މަރުކަޒުގައި މަސައްކަތްކުރަން ޖެހޭނެއެވެ.

މި ފުރުސަތު ދިނުމަށް ނިންމާފައިވަނީ 40 ދަރިވަރުންނަށެވެ. ސްކޮލަރޝިޕްގައި ބައިވެރިވުމަށް އެދި ހުށައެޅުމުގެ ފުރުޞަތު މިމަހުގެ 25 ވަނަ ދުވަހުގެ މެންދުރުފަހު 14:00ޖެހުމާ ހަމައަށް މިހާރު ވަނީ ހުޅުވާލާފައެވެ. ސްކޮލަރޝިޕަށް އެދި ގޫގުލް ފޯމް ލިންކެއް މެދުވެރިކޮށް ހުށައެޅޭނެ އެވެ. މި ލިންކު ދިވެހި ސަރުކާރުގެ ގެޒެޓުގައި ޝާއިޢުކޮށްފައިވާ ސްކޮލަރޝިޕާ ގުޅޭ އިޢުލާނުގައި ހިމަނާފައިވާނެ އެވެ. މި ސްކޮލަރޝިޕްގައި ބައިވެރިވެވޭނީ ދިވެހިރާއްޖޭގެ ޤައުމީ ސަނަދުތަކުގެ އޮނިގަނޑުގެ ލެވެލް 7، 8 ނުވަތަ 9ގެ ސަނަދެއް ހާސިލުކޮށްފައިވާ މީހުންނަށް އެކަންޏެވެ.

މިފަދަ ފުރުސަތެއް ހުޅުވާލުމުގެ މަޤުޞަދަކީ ދިވެހި ތަރިކައިގެ ޢިލްމު އުފައްދައި، ޤާބިލު ތަރިކަވެރީންތަކެއް އުފެއްދުންކަމަށް ތަރިކަ ދިރާސާކުރާ ޤައުމީ މަރުކަޒުން ބުނެފައިވެ އެވެ.

މި ސްކޮލަރޝިޕްގައި ބައިވެރިވާ މީހުންނަށް ތަރިކައިގެ ދާއިރާގެ ކޮންމެވެސް އެއް ފަންނެއް ދަސްކުރުމުގެ ފުރުސަތު ލިބިގެންދާނެ އެވެ. އަދި މި ސްކޮލަރޝިޕްގައި ބައިވެރިވާ ފަރާތްތަކަށް ތަރިކައިގެ ދާއިރާގެ ޢިލްމީ އަދި ދިރާސީ ފޮތްތައް ޝާއިޢުކުރުމުގެ ފުރުސަތު ވެސް ލިބޭނެ އެވެ.