ނޭޕާލްގެ ޒުވާނުން އިސްނަގައިގެން ކުރަމުންދާ މުޒާހަރާތަކުގައި ފުލުހުންނާ ހިނގި ކުރިމަތިލުންތަކުގައި 19 މީހުން މަރުވެ، ޕްރެޝަރު ބޮޑުވުމާ އެކު އެ ބޮޑުވަޒީރު ކަދްގާ ޕްރަސާދް ޝަރްމާ އޯލީ އިސްތިއުފާދެއްވައިފިއެވެ.
މި މުޒާހަރާތައް ފެށުނީ، ސިޔާސީ ފަރާތްތަކާއި އެފަރާތްތަކުގެ އާއިލާތަކަށް ފާޑުކިޔާ، "ނެޕޯ ކިޑްސް" ގެ ނަމުގައި މަޝްހޫރުވެފައިވާ އޮންލައިން ހަރަކާތަކާ ގުޅިގެން، ސަރުކާރުން ފޭސްބުކް ފަދަ ސޯޝަލް މީޑިއާ ޕްލެޓްފޯމްތައް މަނާކުރުމާ ގުޅިގެންނެވެ.
މި ހަމަނުޖެހުންތަކާ ގުޅިގެން ސަރުކާރުން ކާފިއު އެއް އިއުލާނުކުރި ނަމަވެސް ޒުވާނުން ދަނީ މަގުތަކަށް ނުކުމެ މުޒާހަރާ ކުރަމުން ނެވެ. އެގޮތުން އެ ގައުމުގެ ގާނޫނު ހަދާ މަޖިލީހުގެ އިމާރާތަށް ވަދެ އަލިފާން ރޯކޮށް، ސިޔާސީ ޕާޓީތައް ހިންގާ އޮފީސްތަކަށް ހަމަލާދީ، އަދި ގިނަ އަދަދެއްގެ ސިޔާސީ މީހުންގެ ގެތަކަށް އަމާޒުކޮށް ހަމަލާދީފައިވެ އެވެ. މުޒާހަރާ ހޫނުވެ، ހަލަބޮލިވުމުގެ ސަބަބުން ކަތަމަންޑޫގެ ޓްރިބުވަން އިންޓަރނޭޝަނަލް އެއަރޕޯޓް ވެސް ވަނީ ވަގުތީގޮތުން ބަންދުކޮށްފަ އެވެ.
އޯލީ، އެމަނިކުފާނުގެ އިސްތިއުފާގެ ސިޓީގައި ވިދާޅުވީ، "ސިޔާސީ ކަންކަމާއި، ދިމާވެފައިވާ މައްސަލަތައްކަށް ހައްލު ހޯދަން މަގުފަހިކުރުމަށް" އިސްތިއުފާދެއްވާ ކަމަށެވެ.
ނޭޕާލްގެ ބޮޑު ވަޒީރު މިއަދު އިސްތިއުފާދެއްވިއިރު އެމަނިކުފާނުގެ ދެ ވަޒީރަކު ވެސް ވަނީ އެ ހާލަތުގައި މަގާމު އަދާކުރެވެން ނެތް ކަމަށް ވިދާޅުވެ އިއްޔެ އިސްތިއުފާދެއްވާފަ އެވެ.
ނޭޕާލްގެ ޒުވާނުން މުޒާހަރާކުރަމުން ދަނީ އެ ގައުމުގެ ސަރުކާރުގެ ކޮރަޕްޝަނާއި، ސަރުކާރާއި ނުފޫޒު ގަދަ މީހުންގެ ގާތްތިމާގެ މީހުންނަށް ނުޙައްޤުން މަޤާމުތައް ދިނުމާ ދެކޮޅަށެވެ.
