ސްޓޭޓް އިލެކްޓްރިކް ކޮމްޕެނީ (ސްޓެލްކޯ)ގެ މެނޭޖިން ޑިރެކްޓަރުގެ މަގާމުގައި ހުންނެވި ހުސެއިން ފަހުމީ ވަކިކޮށް، އެ މަގާމަށް މިފްކޯގެ ސީއީއޯއަކަށް ހުންނެވި އަހުމަދު ޝަމާހު ރަޝީދު އައްޔަނުކޮށްފި އެވެ.
ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ) އިން ކުރި ޕޯސްޓެއްގައި ވަނީ އެ މަގާމަށް ގެނެވުނު ބަދަލު އިއުލާނުކޮށްފަ އެވެ. އެހެންނަމަވެސް ބަދަލު ގެނައީ ކޮން ސަބަބަކާ ހުރެ ކަމެއް ހާމައެއް ނުކުރެ އެވެ.
ދައުލަތުގެ ކަރަންޓު ކުންފުނީގެ ވެރިޔާގެ މަގާމަށް ބަދަލު ގެނެސްފައިމިވަނީ މާލެ ސަރަހައްދުން ކަރަންޓު ކެނޑުމުގެ މައްސަލަ ބޮޑުވެފައިވަނިކޮށެވެ. އެ މައްސަލަ ފުލުހުންގެ ޚިދުމަތުން މިހާރު ތަހުގީގު ވެސް ދަނީ ކުރަމުންނެވެ.
ސްޓެލްކޯގެ އެމްޑީގެ މަގާމުން ފަހުމީ ވަކިކޮށްފައިވާއިރު އެ ކުންފުންޏާއި އޭނާ ގުޅިވަޑައިގެންނެވީ 1998 ގަ އެވެ. އެ ކުންފުނީގެ ވެރިޔާގެ މަގާމަށް އޭނާ ހަމަޖެއްސިއިރު ހުންނެވީ ޖެނެރަލް މެނޭޖަރުގެ މަގާމުގަ އެވެ.
