އިތުރު ފަސް އަތޮޅެއްގައި އާރްޓީއެލް ފެރީގެ ހިދުމަތް ފެށުމުގެ ތައްޔާރީތައް ވާން ފަށައިފިއެވެ.
އާރްޓީއެލްގެ ހިދުމަތް ދޭން ސަރުކާރުން ހަވާލުކޮށްފައި ވަނީ އެމްޓީސީސީއާ އެވެ. އަލަށް އާރްޓީއެލް ހިދުމަތް ފަށަން ނިންމާފައިވާ އަތޮޅުތަކުގެ ތެރޭގައި މ. ފ. ދ. ތ. ގެ އިތުރުން ލ. އަތޮޅު ހިމެނޭ އިރު މިހާރު ރާއްޖޭގެ 10 އަތޮޅުގައި އާރްޓީއެލް ހިދުމަތްދެމުން އަންނަކަން ފާހަނގަ ކޮށްލަންޖެހެއެވެ.
ބޭސްލައިން ސާވޭ މި މަހާއި އަންނަ މަހު ކުރިއަށް ގެންދާނެ ކަމަށާއި ފެރީގެ ހިދުމަތް ފެށުމާ ގުޅޭ ގޮތުން ހަދަންޖެހޭ ސާވޭ މި މަހު ފެށުމަށް ނިންމާފައިވާ ކަމަށް ޓްރާންސްޕޯޓް މިނިސްޓްރީން ބުނެފައިވެއެވެ. ސާވޭ ފެށުމަށް ޖަޕާން އިންޓަނޭޝަނަލް ކޯޕަރޭޝަން އެސިސްޓެންސް (ޖައިކާ) އާ ވެސް މަޝްވަރާކޮށްފައިވާ ކަމަށާއި އެ ބައްދަލުވުމުގައި ޖައިކާގެ ފަރާތުން ކުރިއަށް ގެންދިއުމަށް ހަމަޖެހިފައިވާ ބޭސްލައި ސާވޭއާ ބެހޭ މައުލޫމާތު ހިއްސާކޮށްފައިވާ ކަމަށް ވެސް މިނިސްޓްރީން ބުންޏެވެ.
އަތޮޅުތެރޭގެ ދަތުރުފަތުރަށް ބޮޑު އިންގިލާބެއް ގެނައި ފެރީގެ މި ހިދުމަތް ފެށީ 2022 ވަނަ އަހަރުގައިކަން ފާހަނގަ ކޮށްލަން ޖެހެއެވެ. އެ މަޝްރޫއު ކުރިޔަށް ގެންދަނީ ތިން ފިޔަވައްސަކަށް ބަހާލައިގެން ހަ ޒޯނެއް ކަނޑައަޅައިގެންނެވެ. އަދި މި ޕްރްޖެކްޓަށް 800 މިލިއަން ރުފިޔާ ހަރަދުކުރެއެވެ.
