ސްރީލަންކާގެ އިޤްތިސާދުގެ ތެރޭގައި އޮތް ނުރަސްމީ ނުވަތަ "ކަޅު ބާޒާރު" (ބްލެކް އިކޮނޮމީ) މެދުވެރިކޮށް ޤަވާއިދާ ޚިލާފަށް ޤައުމުން ބޭރަށް ޑޮލަރު ފޮނުވަމުންދިޔަ ދިޔުން، ސަރުކާރުގެ ހަރުދަނާ ފިޔަވަޅުތަކާއެކު ހުއްޓުވާފައިވާ ކަމަށް އެ ޤައުމުގެ ރައީސް އަނޫރާ ކުމާރަ ޑިސާނާޔަކަ ވިދާޅުވެއްޖެއެވެ.

އާންމު ޖަލްސާއެއްގައި ވާހަކަފުޅު ދައްކަވަމުން ރައީސް ޑިސާނާޔަކަ ވިދާޅުވީ، ކްރިމިނަލް އިންވެސްޓިގޭޝަން ޑިޕާޓްމަންޓް (ސީއައިޑީ) އާއި ސްރީލަންކާ ކަސްޓަމްސް ގުޅިގެން ކުރިއަށްގެންދިޔަ ޚާއްސަ މަސައްކަތްތަކުގެ ސަބަބުން، ނުރަސްމީ މަގުތަކުން ޑޮލަރު ބޭރުވުން ހުއްޓުވުމުގައި ބޮޑެތި ކާމިޔާބީތަކެއް ހޯދިފައިވާ ކަމަށެވެ. އެގޮތުން، ގާތްގަނޑަކަށް އެއް ބިލިއަން އެމެރިކާ ޑޮލަރު ޤަވާޢިދާ ޚިލާފަށް ޤައުމުން ބޭރުކޮށްފައިވާ ކަމަށް އެމަނިކުފާނު ފާހަގަކުރެއްވިއެވެ. މިއީ ސްރީލަންކާއިން އަހަރެއްގެ މައްޗަށް ސައި އެކްސްޕޯޓްކޮށްގެން ލިބޭ ޖުމްލަ އާމްދަނީއާ އެއްވަރުގެ އަދަދެކެވެ.

ރައީސް ވިދާޅުވީ، ކުރިން ދައުލަތަށް ލިބެންޖެހޭ އާމްދަނީ ޓްރެޒަރީއާ ހަމައަށް ވާސިލުވުމުގެ ކުރިން އެހެން ދިމަދިމާއަށް އަނބުރާލަމުން ދިޔަ ކަމަށާއި، އަދި ޓްރެޒަރީއަށް ވަންނަ ފައިސާވެސް ނަހަމަ ގޮތުގައި ބޭނުންކުރަމުން ދިޔަ ކަމަށެވެ. ނަމަވެސް، މިހާރު އެފަދަ ހުރިހާ ދޮރުތަކެއް ބަންދުކޮށް، ދައުލަތަށް ލިބެންޖެހޭ ކޮންމެ ލޯލާރިއެއްވެސް ޚަޒާނާއަށް ޖަމާވަމުންދާކަން ސަރުކާރުން ކަށަވަރުކޮށްފައިވާ ކަމަށް އެމަނިކުފާނު ވިދާޅުވިއެވެ.

މި ފިޔަވަޅުތަކުގެ ހެޔޮ ނަތީޖާ ފެންނަމުންދާކަން ފާހަގަކުރައްވަމުން ރައީސް ވިދާޅުވީ، 2025 ވަނަ އަހަރު ދައުލަތުގެ އާމްދަނީ ޤައުމީ އުފެއްދުންތެރިކަން ނުވަތަ ޖީޑީޕީގެ ނިސްބަތުން 16.7 އިންސައްތައަށް އަރާފައިވާ ކަމަށެވެ. މިއީ ވޭތުވެދިޔަ ގާތްގަނޑަކަށް ތިން ދަހަރު (30 އަހަރު) ދުވަހުގެ ތެރޭގައި ދައުލަތުގެ އާމްދަނީ މި މިންވަރަށް މައްޗަށް ދިޔަ ފުރަތަމަ ފަހަރެވެ. މީގެއިތުރުން، 1957 ވަނަ އަހަރަށްފަހު ބަޖެޓުގެ ޑެފިސިޓް އެންމެ ކުޑަ މިންވަރަކަށް މިހާރު ތިރިކުރެވިފައިވާ ކަމަށާއި، މިއީ އާމްދަނީ އިތުރުކުރުމުގެ އިތުރުން ދައުލަތުގެ ޚަރަދުތައް ހަރުދަނާކަމާއެކު ކޮންޓްރޯލް ކުރުމުގެ ނަތީޖާ ކަމުގައި ޑިސާނާޔަކަ ވިދާޅުވިއެވެ.

ކުރީގެ ސަރުކާރުތަކުން އެކަށީގެންވާ ދިރާސާއެއް ނެތި ބޮޑެތި އިންފްރާސްޓްރަކްޗަރ މަޝްރޫޢުތައް ހިންގާފައިވާތީ އެކަމަށް ރައީސް ފާޑުވިދާޅުވިއެވެ. އެގޮތުން، ރަނގަޅު ދިރާސާތަކެއް ނެތި ބަނދަރުތަކާއި އެއާޕޯޓްތައް އެޅުމަކީ ރައްޔިތުންގެ ފައިސާ އިސްރާފުވުން ކަމަށް އެމަނިކުފާނު ވިދާޅުވިއެވެ.

ކުރިއަށް އޮތް އަހަރަށް ރޭވިފައިވާ ކަންކަމަށް އަލިއަޅުއްވާލައްވަމުން ރައީސް ޑިސާނާޔަކަ އިޢުލާނު ކުރެއްވި ގޮތުގައި، ކެޕިޓަލް ޚަރަދުގެ ގޮތުގައި ތަރައްޤީގެ މަޝްރޫޢުތަކަށް 2 ޓްރިލިއަން ރުޕީސް ކަނޑައެޅުމަށް ވަނީ ނިންމާފައެވެ. މިއީ ތާރީޚުގައިވެސް ތަރައްޤީގެ މަސައްކަތްތަކަށް މިހާ ބޮޑު ބަޖެޓެއް ކަނޑައެޅޭ ފުރަތަމަ ފަހަރެވެ. އަދި ޑިސްޓްރިކްޓް ކޯޑިނޭޓިން ކޮމިޓީތަކާއި ޑިސްޓްރިކްޓް ސެކްރެޓެރީން މެދުވެރިކޮށް، ކޮންމެ ޑިސްޓްރިކްޓެއްގެ އިސްކަންދޭ ކަންކަމަށް ޚަރަދުކުރުމަށްޓަކައި، ކޮންމެ ޑިސްޓްރިކްޓަކަށް 2 ބިލިއަން ރުޕީސްގެ ބަޖެޓް ރިޒާވެއް ދިނުމަށް ހަމަޖެހިފައިވާ ކަމަށްވެސް ވިދާޅުވިއެވެ.

މީގެއިތުރުން، މި ސަރުކާރުން ރައްޔިތުންގެ ލާބަޔާއި މަންފާއަށް ގިނަ ކަންތައްތަކެއް ކޮށްދީފައިވާކަން ފާހަގަކުރައްވަމުން، "މަހަޕޮލަ" ސްކޮލަރޝިޕް އެލަވަންސާއި، ދަނޑުވެރިންގެ ގަސްކާނާގެ ސަބްސިޑީގެ އިތުރުން، ދޮށީ ޢުމުރުގެ މީހުންނަށާއި ޚާއްޞަ އެހީއަށް ބޭނުންވާ ފަރާތްތަކަށް ދޭ އެލަވަންސްތައް ބޮޑުކޮށްދީފައިވާނެ ކަމަށް ރައީސް ޑިސާނާޔަކަ ވިދާޅުވިއެވެ.