ގދ. ގައްދޫގައި ޕާސްޕޯޓުގެ ޚިދުމަތް ރަސްމީކޮށް މިއަދު ފަށައިފިއެވެ.
މި މަސައްކަތަކީ މުޅި ރާއްޖެއަށް ޕާސްޕޯޓުގެ ޚިދުމަތް ފުޅާކުރުމަށް ސަރުކާރުން ކުރަމުންދާ މަސައްކަތުގެ ދަށުން ފެށި ހިދުމަތެކެވެ. މޯލްޑިވްސް އިމިގްރޭޝަނުން ހާމަކުރި ގޮތުގައި، މިއީ ސަރުކާރުން ރައްޔިތުންނަށް ލުއިފަސޭހަކަމާއެކު ޚިދުމަތް ފޯރުކޮށްދިނުމަށް ކުރިއަށްގެންދާ މަޝްރޫޢުގެ ދަށުން އެޅުނު މުހިއްމު ފިޔަވަޅެކެވެ. މި ޚިދުމަތް ގައްދޫގައި އިފްތިތާޙްކުރުމާއެކު، ގދ. އަތޮޅުގެ ރައްޔިތުންނަށް މިހާރު ދެ ރަށަކުން ޕާސްޕޯޓުގެ ޚިދުމަތް ލިބިގެންދާނެއެވެ.
ޕާސްޕޯޓަށް އެދި "އިމުގާ" ޕޯޓަލް މެދުވެރިކޮށް އޮންލައިންކޮށް ހުށަހަޅާއިރު، ޕާސްޕޯޓާ ހަވާލުވުމަށް ނުވަތަ "ކަލެކްޝަން ޕޮއިންޓް" އެއްގެ ގޮތުގައި ތިނަދޫ ސިޓީގެ އިތުރުން މިހާރު ގައްދޫ ވެސް އިޚްތިޔާރު ކުރެވޭނެ އިންތިޒާމު ވަނީ ހަމަޖެހިފައެވެ.
މިއީ އެ ސަރަހައްދުގެ ރައްޔިތުން ޕާސްޕޯޓް ނެގުމަށް ކުރަންޖެހޭ ދަތުރުތަކަށް ބޮޑު ލުޔެއް ލިބިގެންދާނެ ބަދަލެކެވެ. ސަރުކާރުގެ މައިގަނޑު އަމާޒަކީ ލާމަރުކަޒީ ނިޒާމު ހަރުދަނާކޮށް، މަރުކަޒީކޮށް މާލޭގައި އެކަނި ދެމުންދިޔަ ޚިދުމަތްތައް އަތޮޅުތެރޭގެ ރަށްރަށުން ފަސޭހަކަމާއެކު ލިބޭނެ ގޮތް ހެދުމެވެ. މި ސިޔާސަތުގެ ދަށުން، ކޮންމެ އަތޮޅަކުން މަދުވެގެން އެއް ރަށުގައި ޕާސްޕޯޓާއި އައިޑީކާޑުގެ ޚިދުމަތް ލިބޭނެ އިންތިޒާމު ހަމަޖެއްސުމަށް އިމިގްރޭޝަނުން ދަނީ ހަލުވިކަމާއެކު މަސައްކަތް ކުރަމުންނެވެ.
މި ފަދަ ޚިދުމަތްތައް ރަށްރަށަށް ތައާރަފްކުރުމަކީ ރައްޔިތުންގެ ވަގުތާއި ފައިސާ ސަލާމަތްވެ، އަސާސީ ޚިދުމަތްތައް ހޯދުމުގައި ހަމަހަމަކަން ގާއިމުވެގެންދާނެ ކަމެއް ކަމަށް ސަރުކާރުން ގަބޫލުކުރެއެވެ.
