އެގްރޯ ނޭޝަނަލް ކޯޕަރޭޝަން ލިމިޓެޑް (އެގްރޯނެޓް) ގެ ޑިރެކްޓަރުންގެ ބޯޑުގެ އެކައުންޓިންގ އެންޑް ފައިނޭންސް މެންބަރުކަމުގެ މަޤާމަށް ޝަޒުހަތު ލަތީފް މިއަދު އައްޔަންކުރައްވައިފިއެވެ.

ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ) އިން ވިދާޅުވީ، ސަރުކާރުގެ ކުންފުނިތަކުގެ ހިންގުން ހަރުދަނާކުރުމަށް ކުރަމުންދާ މަސައްކަތުގެ ދަށުން، އެގްރޯނެޓްގެ ބޯޑަށް ޝަޒުހަތު އައްޔަންކުރަން ނިންމީ މިއަދު ކަމަށެވެ.

ޝަޒުހަތު ލަތީފަކީ މާލީ ދާއިރާގައި ފާހަގަކޮށްލެވޭ ފަދަ ތަޖުރިބާތަކެއް ލިބިވަޑައިގެންފައިވާ ބޭފުޅެކެވެ. އެގޮތުން، 2017 ވަނަ އަހަރުން ފެށިގެން އޭނާ ގެންދަވަނީ ފައިނޭންސް މިނިސްޓްރީގެ ބަޖެޓް އެނަލިސްޓެއްގެ މަޤާމު އަދާކުރައްވަމުންނެވެ. އޭނާގެ މަސައްކަތްޕުޅުތަކުގެ ތެރޭގައި ދައުލަތުގެ އަހަރީ ބަޖެޓް އެކުލަވާލުމާއި، ޚަރަދުތައް ދިރާސާކުރުމުގެ އިތުރުން ފިސްކަލް ރިސްކް އެސެސްމަންޓްތައް ތައްޔާރުކުރުން ފަދަ މުހިންމު ޒިންމާތައް ހިމެނެއެވެ.

މީގެއިތުރުން، ދައުލަތުގެ މާލީ ނިޒާމު ހަރުދަނާކުރުމަށް ތައްޔާރުކުރާ "ބަޖެޓް ސްޓެޓިސްޓިކްސް ބުކް" އާއި "ފިސްކަލް ރިސްކް ސްޓޭޓްމަންޓް" ފަދަ ލިޔުންތައް ތައްޔާރުކުރުމުގައިވެސް ޝަޒުހަތު ވަނީ އިސް ދައުރެއް އަދާކުރައްވާފައެވެ. އަދި ސަރުކާރުގެ އެކި އިދާރާތަކަށް ބަޖެޓާ ގުޅޭ ފަންނީ އިރުޝާދު ދެއްވުމުގައިވެސް އޭނާ އަކީ ތަޖުރިބާކާރެކެވެ.

ތަޢުލީމީ ގޮތުން ބަލާއިރު، ޝަޒުހަތު ވަނީ އިނގިރޭސިވިލާތުގެ ޔުނިވަރސިޓީ އޮފް ބެޑްފޯޑްޝަޔަރއިން ފައިނޭންސްގެ ދާއިރާއިން މާސްޓަރސް އޮފް ބިޒްނަސް އެޑްމިނިސްޓްރޭޝަން (އެމްބީއޭ) ހާސިލުކުރައްވާފައެވެ. އަދި ޔުނިވަރސިޓީ އޮފް ދަ ވެސްޓް އޮފް އިންގްލެންޑުން އެކައުންޓިންގ އެންޑް ފައިނޭންސްގެ ދާއިރާއިން ފުރަތަމަ ޑިގްރީ ހާސިލުކުރައްވާފައިވެއެވެ.

އެގްރޯނެޓްގެ ބޯޑަށް އައި މި ބަދަލާއެކު، އެ ކުންފުނީގެ މާލީ ކަންކަން ބެލެހެއްޓުމަށާއި އިދާރީ ހިންގުމަށް އިތުރު ކުރިއެރުންތަކެއް ލިބިގެންދާނެއެވެ.