އެއް އަހަރު ދުވަހުގެ މުއްދަތަށް ބޭނުންކުރެވޭ މަލްޓިޕަލް-އެންޓްރީ އުމްރާ ވިސާ ސައުދީން ތައާރަފްކޮށްފިއެވެ.
ސައުދީ އަރަބިއްޔާގެ މިނިސްޓްރީ އޮފް ހައްޖު އެންޑް އުމްރާއިން، އެއް އަހަރު ދުވަހުގެ މުއްދަތަށް އެކި ފަހަރު މަތިން އެތެރެވޭގޮތަށް ފަރުމާކޮށްފައިވާ ހާއްސަ އުމްރާ ވިސާއެއް ރަސްމީކޮށް މިވަނީ އިފްތިތާހުކޮށްފައެވެ.
މި އާ ވިސާއަކީ ވިސާ ދޫކުރާ ތާރީޚުން ފެށިގެން 365 ދުވަހުގެ މުއްދަތަށް ސައްހަ ވިސާއެކެވެ. މި ވިސާގެ ދަށުން ޒިޔާރަތްކުރާ ފަރާތްތަކަށް މުއްދަތު ހަމަވުމުގެ ކުރިން އެކި ފަހަރު މަތިން ސައުދީ އަރަބިއްޔާއަށް އެތެރެވުމުގެ ފުރުސަތު ލިބިގެންދާނެއެވެ. އަދި ޖުމްލަ ގޮތެއްގައި 90 ދުވަހާ ހަމައަށް ރާއްޖޭގައި މަޑުކުރުމުގެ ހުއްދަ މި ވިސާގެ ދަށުން ލިބިގެންދާނެ ކަމަށް މިނިސްޓްރީން މައުލޫމާތުދެއެވެ.
މި ނިންމުމަކީ ސައުދީ ވިޝަން 2030 އާއި "ޕިލްގްރިމް އެކްސްޕީރިއަންސް ޕްރޮގްރާމް" ގެ މަގުސަދުތައް ހާސިލުކުރުމަށް އެޅުނު މުހިންމު ފިޔަވަޅެކެވެ. މީގެ މައިގަނޑު ބޭނުމަކީ އުމްރާވެރިން ސައުދީއަށް އައުމަށް ކުރަންޖެހޭ ކަންކަން ލުއިފަސޭހަކޮށްދިނުމާއި، އަޅުކަމުގެ ތަޖުރިބާ މުއްސަނދިކޮށް، ހިދުމަތްތަކުގެ ފެންވަރު މަތިކުރުމެވެ.
މި ވިސާ ބޭނުންކުރާ ކޮންމެ ފަހަރަކުވެސް، ސައުދީ ސަރުކާރުން ހުއްދަދީފައިވާ 'ނުސުކް' ޕްލެޓްފޯމް މެދުވެރިކޮށް ހިދުމަތްދޭ ފަރާތަކުން ސާވިސް ޕެކޭޖެއް ގަންނަންޖެހޭނެއެވެ. އަދި މި ޕެކޭޖުގެ މުއްދަތު ވިސާގައި ބާކީ ހުރި ދުވަސްތަކަށްވުރެ އިތުރުވެގެން ނުވާނެއެވެ. މީގެ އިތުރުން، ސައުދީއަށް އެތެރެވުމުގެ ކުރިން ނުސުކް އެޕްލިކޭޝަން މެދުވެރިކޮށް އުމްރާ ހުއްދަ ހޯދުމަކީ ލާޒިމު ކަމެކެވެ.
މިނިސްޓްރީން ހާމަކުރި ގޮތުގައި، ކޮންމެ ފަހަރަކު ސައުދީން ފުރައިގެން ދިއުމުން ވިސާ ޑިއެކްޓިވޭޓް ވާނެއެވެ. އަދި އަލުން އެނބުރި އަންނަ އިރު ގަވާއިދުތަކާ އެއްގޮތަށް ކަންކަން ފުރިހަމަކުރުމުން ވިސާ އަލުން އެކްޓިވޭޓް ވެގެންދާނެއެވެ. ނަމަވެސް، ހައްޖު މޫސުމުގެ ދުވަސްވަރު (ޒުލްގައިދާ މަހުގެ 1 ވަނަ ދުވަހުން ފެށިގެން ޒުލްހައްޖާ މަހުގެ 13 ވަނަ ދުވަހުގެ ނިޔަލަށް) މި ވިސާ އެކްޓިވޭޓެއް ނުކުރެވޭނެއެވެ.
ހައްޖު އެންޑް އުމްރާ މިނިސްޓްރީން ފާހަގަކުރި ގޮތުގައި، މި އާ ވިސާގެ ސަބަބުން އުމްރާވެރިންނަށް އެމީހުންގެ ދަތުރުތައް ރޭވުމުގައި އިތުރު ލުއިފަސޭހަކަމާއި އިޚްތިޔާރުތައް ލިބިގެންދާނެއެވެ. އަދި މިއީ ޑިޖިޓަލް ވަސީލަތްތައް މެދުވެރިކޮށް އުމްރާވެރިންނަށް ދެވޭ ހިދުމަތްތައް އިތުރަށް ހަރުދަނާކޮށް، އެއް ފުރާޅެއްގެ ދަށުން ހުރިހާ ހިދުމަތެއް ފޯރުކޮށްދިނުމަށް ކުރެވޭ މުހިންމު މަސައްކަތެކެވެ.
