ދިވެހިރާއްޖެއަކީ ދުނިޔޭގެ ފަތުރުވެރިންގެ މެދުގައި އެންމެ މަގުބޫލު އެއް މަންޒިލްގެ ގޮތުގައި އޮތްއިރު، "ހަނީމޫން" މަންޒިލެއްގެ ގޮތުގައި ރާއްޖެއަށް އޮތް މަގުބޫލުކަން ދަމަހައްޓައިފި ކަމަށް ޓޫރިޒަމް މިނިސްޓްރީން ހާމަކޮށްފިއެވެ.

މިކަން ހާމަވެފައިވަނީ ޓޫރިޒަމް މިނިސްޓްރީން ދާދިފަހުން ކުރިއަށް ގެންދިޔަ "ވިޒިޓާ ސާވޭ" ގެ ނަތީޖާއިންނެވެ. މިއީ އަހަރުތަކެއްގެ މެދުކެނޑުމަކަށްފަހު، މިދިޔަ އަހަރުގެ އޮކްޓޫބަރު މަހު ރާއްޖެއަށް އައި ފަތުރުވެރިންގެ ފަރާތުން މައުލޫމާތު އެއްކޮށްގެން ތައްޔާރުކޮށްފައިވާ މުހިންމު ދިރާސާއެކެވެ.

މި ދިރާސާގެ ނަތީޖާ ދައްކާގޮތުން، ރާއްޖެއަށް ޒިޔާރަތްކުރި ފަތުރުވެރިންގެ 73 އިންސައްތަ މީހުންނަކީ މުޅިން އަލަށް ރާއްޖޭގެ ރީތިކަން ތަޖުރިބާކުރަން އައި މީހުންނެވެ. އަދި ރާއްޖެއަކީ "ހަނީމޫން" މަންޒިލެއްގެ ގޮތުގައި އޮތް ވަރުގަދަ ނަން ދަމަހައްޓަމުންދާކަން ހާމަވަނީ، އައި މީހުންގެ 65 އިންސައްތައަކީ އެމީހުންގެ ބައިވެރިޔާއާ އެކު އައި މީހުން ކަމަށްވާތީއެވެ. މީގެ އިތުރުން، މިހާރު ރާއްޖެއަށް އެންމެ ގިނައިން އަންނަނީ "މިލޭނިއަލް" ނުވަތަ ޒުވާން އުމުރުފުރާގެ ފަތުރުވެރިންކަން މި ސާވޭއިން ފާހަގަކުރެވެއެވެ.

ޓޫރިޒަމް މިނިސްޓްރީން ވިދާޅުވި ގޮތުގައި، ދުނިޔޭގެ އެންމެ މަތީ ފަންތީގެ ލަގްޒަރީ މަންޒިލެއްގެ ގޮތުގައި ރާއްޖެއަށް އޮތް ޑިމާންޑް އަދިވެސް އޮތީ ވަރަށް ވަރުގަދަކޮށެވެ. މި ޑިމާންޑަކީ ހަމައެކަނި އަގުހެޔޮވުމުގެ ސަބަބުން ނުވަތަ ދަތުރުފަތުރުގެ ފަސޭހަކަމުން އޮތް ކަމެއް ނޫން ކަމަށާއި، މިއީ ސީދާ ރާއްޖޭގެ ގުދުރަތީ ރީތިކަމާއި ތަފާތު ތަޖުރިބާ ހޯދުމަށް ފަތުރުވެރިން ބޭނުންވާ މިންވަރު ކަމަށް މިނިސްޓްރީން ބުނެއެވެ.

ފަތުރުވެރިން ރާއްޖޭގައި އެވަރެޖުކޮށް 4 ދުވަހާއި 7 ދުވަހާ ދެމެދުގެ މުއްދަތެއް ހޭދަކުރާއިރު، ގިނަ މީހުންގެ ފުރަތަމަ އިޚްތިޔާރަކީ އަދިވެސް ރާއްޖޭގެ ޚާއްޞަ "ވަން އައިލެންޑް، ވަން ރިސޯޓް" ކޮންސެޕްޓެވެ.

ފަތުރުވެރިކަން ކުރިއެރުވުމަށް ކުރައްވަމުންދާ މަސައްކަތްތަކާއެކު، ނިމިދިޔަ އަހަރަކީ ރާއްޖޭގެ ތާރީޚުގައި ފުރަތަމަ ފަހަރަށް 2 މިލިއަން ފަތުރުވެރިންގެ އަމާޒަށް ވާސިލުވި އަހަރެވެ. މީގެ ސަބަބުން ދައުލަތަށް ލިބުނު އާމްދަނީވެސް ވަނީ ރެކޯޑު މިންވަރަކަށް އިތުރުވެފައެވެ.

ފަތުރުވެރިން ރާއްޖެ އިޚްތިޔާރުކުރާ އެންމެ ބޮޑު ސަބަބެއްގެ ގޮތުގައި މި ދިރާސާގައި ފާހަގަކޮށްފައިވަނީ ރާއްޖޭގެ ގުދުރަތީ ރީތިކަމެވެ. މިކަމަކީ ރާއްޖޭގެ ފަތުރުވެރިކަން ދެމެހެއްޓެނިވި ގޮތެއްގައި ކުރިއަށް ގެންދިއުމަށް ލިބޭ ވަރަށް ބޮޑު ހިތްވަރެއް ކަމަށް ޓޫރިޒަމް މިނިސްޓްރީން ދެކެއެވެ.