މާލޭ ނޯތު ހާބަރުގެ "އޭ ޒޯން" ގައި އޮޑިދޯނިފަހަރަށް ބޭނުންވާ ފެނާއި ކަރަންޓުގެ ޚިދުމަތް ފޯރުކޮށްދިނުމަށް ބޭނުންވާ ނިޒާމް ގާއިމުކޮށް، އެ ސަރަހައްދުން ޚިދުމަތް ދޭން ފަށައިފިއެވެ.

މޯލްޑިވްސް ޕޯޓްސް ލިމިޓެޑް (އެމްޕީއެލް) އިން ހާމަކޮށްފައިވާ ގޮތުގައި، މި ޚިދުމަތް ރަސްމީކޮށް ދޭން ފަށާފައިވަނީ 07 ޖުލައި 2026 ގަ އެވެ.

މީގެ ކުރިން މާލޭ ނޯތު ހާބަރުގެ "އޭ ޒޯން" ނުވަތަ ބޮޑުތަކުރުފާނު މަގާވީ ފަރާތުން އޮޑިދޯނިފަހަރަށް ފެނާއި ކަރަންޓުގެ ޚިދުމަތެއް ނުލިބެއެވެ. އޭރު މި ޚިދުމަތްތައް ފޯރުކޮށްދެމުން ދިޔައީ ހަމައެކަނި އެ ސަރަހައްދުގެ "ބީ ޒޯން" އަދި "ސީ ޒޯން" އިންނެވެ.

ނަމަވެސް، ސަރުކާރުން ކުރިއަށް ގެންދިޔަ ބޮޑުތަކުރުފާނު މަގު ތަރައްޤީކުރުމުގެ މަޝްރޫޢުގެ ދެވަނަ ސެގްމަންޓް ނިމި، ނޯތު ހާބަރު ސަރަހައްދު އަލުން ހުޅުވުމާ ގުޅިގެން، ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވަނީ އެ ސަރަހައްދުގެ ޚިދުމަތްތައް އިތުރަށް ފުޅާކުރުމަށް އިރުޝާދު ދެއްވާފައެވެ. ރައީސްގެ މި އެންގެވުމާ އެއްގޮތަށް، "އޭ ޒޯން" ގައި ފެނާއި ކަރަންޓުގެ ޚިދުމަތް ގާއިމުކުރުމުގެ އަމަލީ މަސައްކަތް އެމްޕީއެލް އިން ފަށާފައިވަނީ މިއަހަރުގެ މާރިޗު މަހުގެ ތެރޭގައެވެ.

މި މަޝްރޫޢުގެ ދަށުން މިހާރު "އޭ ޒޯން" ގައި ވަނީ އެއްފަހަރާ 48 އުޅަނދަށް ކަރަންޓު ދެވޭނެ އިންތިޒާމު ހަމަޖައްސާފައެވެ. އަދި އޮޑިދޯނިފަހަރަށް ފެން ފޯރުކޮށްދިނުމަށްޓަކައި 16 ޕޮއިންޓެއް އެ ސަރަހައްދުގައި ވަނީ ގާއިމުކޮށްފައެވެ. މިއީ ނޯތު ހާބަރު ބޭނުންކުރާ އޮޑިދޯނިފަހަރަށާއި، އުޅަނދުފަހަރުގެ ފަޅުވެރިންނަށް ލިބިގެންދާނެ ވަރަށް ބޮޑު ލުއިފަސޭހަކަމެއްކަން އެމްޕީއެލް އިން ފާހަގަކުރެއެވެ.

އެމްޕީއެލް އިން އިތުރަށް ބުނެފައިވަނީ، މި ނިޒާމް ގާއިމުކުރުމަށްޓަކައި މާލޭ ނޯތު ހާބަރުގެ މުވައްޒަފުންނާއި، އެ ކުންފުނީގެ ކަމާގުޅޭ އެކި ޑިޕާޓްމަންޓްތަކުން ވަރަށް ބުރަ މަސައްކަތްތަކެއް ކޮށްފައިވާ ކަމަށެވެ. މި އާ ޚިދުމަތާއެކު، މާލޭގެ އުތުރު ބަނދަރުގެ ތޮށިގަނޑާ ކައިރިކުރާ އުޅަނދުފަހަރަށް މީގެ ކުރިން ކުރިމަތިވި ދަތިތަކަށް ބޮޑު ހައްލެއް ލިބިގެންދާނެއެވެ.