ނަފްސާނީ ބަލިތަކަށް ފަރުވާ ދިނުމަށް ހާއްސކޮށްގެން ސަރުކާރުން ބިނާކުރާ ހޮސްޕިޓަލް އެޅުމަށް ހަމަޖެހިފައިވަނީ ހުޅުމާލޭގައި ކަމަށް ސިއްހަތާއި އާއިލާއާއި އިޖުތިމާއީ އެހީއާ ބެހޭ ވަޒީރު ޑރ. ގީލާ އަލީ މިއަދު ވިދާޅުވެއްޖެއެވެ.

ރައްޔިތުންގެ މަޖިލީހުގެ މިއަދުގެ ޖަލްސާގައި ގަލޮޅު އުތުރު ދާއިރާގެ މެންބަރު މުހައްމަދު އިބްރާހީމް ކުރެއްވި ސުވާލުތަކަށް ޖަވާބު ދެއްވަމުން ވަޒީރު ވިދާޅުވީ، ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ވައުދުފުޅާ އެއްގޮތަށް މި މަޝްރޫއު ކުރިއަށް ގެންދިއުމަށްޓަކައި ހުޅުމާލެއިން 10،000 އަކަފޫޓުގެ ބިމެއް މިހާރު ހަމަޖައްސާފައިވާ ކަމަށެވެ.

މި ހޮސްޕިޓަލް މާލެ ސަރަހައްދުގައި ބިނާކުރަން ނިންމެވި ސަބަބުތަކަށް އަލިއަޅުއްވާލައްވަމުން ވަޒީރު ވިދާޅުވީ، ނަފްސާނީ ފަރުވާ ހޯދާ ގިނަ ފަރާތްތަކެއް މި ސަރަހައްދުގައި ދިރިއުޅޭ ކަމަށާއި، ފަރުވާއަށް ބޭނުންވާ ގިނަ ވަސީލަތްތައްވެސް ގާއިމުވެފައި ހުރީ މާލެ ސަރަހައްދުގައި ކަމަށެވެ. މީގެ އިތުރުން، ކުރިން ޕްލޭންކޮށްފައިވާ ގޮތަށް ލާމު އަތޮޅުގައިވެސް މިފަދަ ހޮސްޕިޓަލެއް ބިނާކުރެވޭނެ ކަމުގެ ޔަގީންކަން ރައީސުލްޖުމްހޫރިއްޔާ ދެއްވާފައިވާކަން ވަޒީރު ފާހަގަކުރެއްވިއެވެ.

"މެންޓަލް ހެލްތު ހޮސްޕިޓަލަކީ ކުރިޔަށް އޮތްތަނުގައި ވަރަށް ޒަމާނީ ވަސީލަތްތަކާއެކު، އެތަނުން ފަރުވާ ހޯދާ ފަރާތްތަކަށް ފުރިހަމަ ސިއްހީ ފަރުވާއެއް ފޯރުކޮށްދެވޭނެ ތަނަކަށް ވާނެ،" ވަޒީރު ވިދާޅުވިއެވެ.

ނަފްސާނީ ދުޅަހެޔޮކަމަށް ސަރުކާރުން ކުރަމުންދާ މަސައްކަތްތަކުގެ މައްޗަށް ވާހަކަ ދައްކަވަމުން، މިދިޔަ އަހަރު ތައާރަފުކުރި 'މެންޓަލް ހެލްތު ހެލްޕްލައިން' އަށް ބޮޑު ތަރުހީބެއް ލިބެމުންދާކަން ވަޒީރު ފާހަގަކުރެއްވިއެވެ. އެގޮތުން މިދިޔަ އަހަރު އެކަނިވެސް 10،000 އަށްވުރެ ގިނަ ކޯލް އެ ހިދުމަތަށް ލިބިފައިވާކަމަށް ވިދާޅުވިއެވެ. މިއީ ނަފްސާނީ އެހީތެރިކަން ބޭނުންވާ ފަރާތްތަކަށް ފުރަތަމަ މަރުހަލާގައި ވާހަކަދައްކާލައި، އެހީތެރިކަން ހޯދުމަށް ފަހިވެފައިވާ މުހިންމު ފުރުސަތެއް ކަމަށްވެސް ވަޒީރު ވިދާޅުވިއެވެ.

މިހާރުވެސް ރާއްޖޭގެ އެކި ސަރަހައްދުތަކުގައި ނަފްސާނީ ފަރުވާގެ ޚިދުމަތް ދެމުންދާކަން ވަޒީރު ފާހަގަކުރެއްވިއެވެ. އޭގެ ތެރޭގައި:

• އައި.ޖީ.އެމް.އެޗް އަދި ހުޅުމާލެ ހޮސްޕިޓަލް
• އައްޑޫ އިކުއިޓޯރިއަލް ހޮސްޕިޓަލް
• ކުޅުދުއްފުށި، އުނގޫފާރު، ލ. ގަން، އަދި ގދ. ތިނަދޫގައި ހުންނަ ހޮސްޕިޓަލްތައް

ދައުލަތުގެ ބަޖެޓުން ޚަރަދުކޮށްގެން ހުޅުމާލޭގައި ބިނާކުރާ މި އާ ހޮސްޕިޓަލަކީ، ރާއްޖޭގައި ނަފްސާނީ ބަލިތަކަށް ފަރުވާ ދިނުމުގެ ނިޒާމު އިތުރަށް ހަރުދަނާކޮށް، ޒަމާނީ ފެންވަރަށް ގެންދިއުމަށްޓަކައި ރައީސް ޑރ. މުއިއްޒު ގެންގުޅުއްވާ ތަސައްވުރުގެ ދަށުން ކުރިއަށްދާ މުހިންމު މަޝްރޫއެކެވެ.