ދިވެހިރާއްޖެއާއި ސްރީލަންކާއާ ދެމެދު އޮތް ޒަމާންވީ ގާތް ގުޅުން އައު އުސްމިންތަކަކަށް ގެންދިއުމަށްޓަކައި، މުހިންމު ހަތް ދާއިރާއަކުން ގުޅުން ބަދަހިކުރުމުގެ ފަހުމުނާމާ (އެމް.އޯ.ޔޫ) ތަކެއްގައި މިއަދު ސޮއިކޮށްފިއެވެ.
މި އެއްބަސްވުންތަކުގައި ސޮއިކުރުމުގެ ރަސްމިއްޔާތު ކުރިއަށްދިޔައީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒާއި އެމަނިކުފާނުގެ އަނބިކަނބަލުން ސާޖިދާ މުޙައްމަދު މިހާރު ސްރީލަންކާއަށް ކުރައްވަމުންދާ ފުރަމާނަ ދަތުރުފުޅުގެ ތެރެއިން، އެޤައުމުގެ ރައީސްގެ އޮފީހުގައެވެ. ލަންކާގެ ރައީސް އަނޫރަ ކުމާރަ ޑިސަނަޔަކަގެ ދައުވަތަކަށް ކުރައްވާ މި ދަތުރުފުޅުގައި ބޭއްވި މި ރަސްމިއްޔާތުގައި ދެ ޤައުމުގެ ރައީސުންނާއި ދައުލަތުގެ އިސް ބޭފުޅުން ބައިވެރިވެވަޑައިގެންނެވިއެވެ.
ރާއްޖޭގެ ފަރާތުން މި ފަހުމުނާމާތަކުގައި ސޮއިކުރެއްވީ ޚާރިޖީ ވަޒީރު އިރުތިޝާމް އާދަމާއި، ރާއްޖެއިން ސްރީލަންކާއަށް ކަނޑައަޅާފައި ހުންނަވާ ސަފީރު މަސްޢޫދު އިމާދެވެ.
މިއަދު ސޮއިކުރެވުނު މުހިންމު އެމްއޯޔޫތަކުގެ ތެރޭގައި ހިމެނެނީ:
- ފަތުރުވެރިކަމުގެ ދާއިރާއިން މީގެ ކުރިން ވެފައިވާ އެއްބަސްވުން އައުކުރުން.
- އަރުޝީފީ (އާކައިވިންގ) މަސައްކަތްތަކުގައި އެއްބާރުލުން ދިނުން.
- ތަޢުލީމީ ދާއިރާއިން މުދައްރިސުންނާއި ސްކޫލް އިސްވެރިން ތަމްރީނުކުރުމާއި ފަންނީ ހުނަރު އިތުރުކުރުން.
- ކުޅިވަރާއި ޒުވާނުން ބިނާކުރުމުގެ ދާއިރާއިން ގުޅުން ބަދަހިކުރުން.
- ދިފާޢީ ދާއިރާއިން އެއްބާރުލުން ދިނުން.
- ދިފާޢީ ތަޢުލީމާއި، ތަމްރީނާއި، ދިރާސާކުރުމުގެ ދާއިރާއިން ގުޅުން ބަދަހިކުރުން.
- އެކަޑެމިކް ކޯޕަރޭޝަން ނުވަތަ މަތީ ތަޢުލީމުގެ ދާއިރާއިން އެއްބާރުލުން ދިނުން.
މި އެމްއޯޔޫތަކުގައި ސޮއިކުރެއްވުމަށްފަހު ރައީސް ޑރ. މުޢިއްޒު ވިދާޅުވީ، މި ދާއިރާތަކުން ގުޅުން ބަދަހިކުރުމަށް ނިންމީ ދެ ޤައުމުގެ މަސްލަހަތު ހިމެނޭ މުހިންމު ކަންކަމުގައި އެއްބާރުލުން އިތުރުކޮށް، ދިވެހި ރައްޔިތުންނަށް އޭގެ ފައިދާ އެންމެ ފުރިހަމަ ގޮތުގައި ހޯދައިދިނުމަށް ކަމަށެވެ. ޚާއްޞަކޮށް ސްރީލަންކާއަކީ ތަޢުލީމީ ގޮތުން ކުރިއަރާފައިވާ ޤައުމަކަށްވުމާއެކު، މިއީ ރާއްޖޭގެ ތަޢުލީމީ ދާއިރާގެ ފަންނީ މީހުން ބިނާކުރުމަށް ލިބުނު ރަނުގެ ފުރުޞަތެއްކަން އެމަނިކުފާނު ފާހަގަކުރެއްވިއެވެ.
"އަޅުގަނޑުމެން ބޭނުންވަނީ ހަމައެކަނި އެމްއޯޔޫތަކެއްގައި ސޮއިކުރުމެއް ނޫން. ބޭނުންވަނީ މި އެއްބަސްވުންތައް ތަންފީޒުކޮށް، އޭގެ ފައިދާ ސީދާ ރައްޔިތުންނަށް ލިބިގެންދާނެ އަމަލީ ނަތީޖާއެއް ނެރެދިނުން،" ރައީސް ވިދާޅުވިއެވެ.
ސްރީލަންކާއަކީ ގިނަ އަދަދެއްގެ ދިވެހިން ދިރިއުޅެމުންދާ، ރާއްޖެއާ އެންމެ ގާތް ގުޅުމެއް ބާއްވާ އެއް ޤައުމެވެ. މި އެމްއޯޔޫތަކަށް ލަންކާގެ ވަޒީރުންގެ މަޖިލީހުންވެސް ކުރިން ވަނީ ރުހުން ދީފައެވެ. ރައީސްގެ ދެކަނބަލުންގެ މި ދަތުރުފުޅު އަންނަ ބުދަ ދުވަހުގެ ނިޔަލަށް ކުރިއަށްދާނެއެވެ.
