ވިއްސާރަ ބޮޑުވާނެ ކަމަށް ލަފާކުރެވުނު ނަމަވެސް، މި ހަތަރު މަސްދުވަހު ރާއްޖޭގެ ފިނިހޫނުމިން ހުންނާނީ އާންމު މިންވަރަށް ވުރެ މަތީގައި ކަމަށް މެޓް އޮފީހުން ބުނެއެވެ. އެގޮތުން ދުވާލުގެ އެންމެ މަތީ ފިނިހޫނުމިނާއި ރޭގަނޑުގެ އެންމެ ދަށް ފިނިހޫނުމިންވެސް އާންމު މިންގަނޑަށް ވުރެ އިތުރުވާނެ ކަމަށް ލަފާކުރެވޭތީ، ވާރޭވެހުނު ކަމުގައިވިޔަސް ވައިގެ ތެރޭގައި ހޫނުމިން ގަދަވާނެ ކަމަށް ބެލެވެއެވެ.
މެޓް އޮފީހުން އިތުރަށް ހާމަކުރި ގޮތުގައި، މި ލަފާކުރުންތަކަކީ ބައިނަލްއަޤުވާމީ މޫސުމީ މޮޑެލްތަކާއި ރާއްޖޭގެ ތާރީޚީ ތަފާސްހިސާބުތަކަށް ބިނާކޮށް ތައްޔާރުކޮށްފައިވާ އަންދާޒާތަކެކެވެ. ރާއްޖެއަށް މިހާރު ހުޅަނގު މޫސުން ފެށިފައިވާއިރު، ކުރިއަށް އޮތް ދުވަސްތަކުގައި މޫސުމަށް އަންނަ ބަދަލުތަކަށް ސަމާލުވެ، ކަނޑުދަތުރުފަތުރު ކުރުމުގައާއި ފެންބޮޑުވެދާނެ ހާލަތްތަކަށް ތައްޔާރުވެ ތިބުމަށް ކަމާބެހޭ އިދާރާތަކުން އިލްތިމާސްކުރެއެވެ.
މި ދުވަސްވަރަކީ އިރުވައި މޫސުން ނިމި، ހުޅަނގު މޫސުން ފެށޭ، ނުވަތަ ދިވެހިން ކިޔާ އުޅޭ ގޮތުން ނަމަ "ދެ މޫސުން ބެދޭ" ދުވަސްވަރެވެ.ދެ މޫސުން ބެދޭއިރު އާންމުކޮށް ވައިގެ މިސްރާބު ބަދަލުވެ، ބޯކޮށް ވާރޭވެހުމާއި ގުގުރުން އިތުރުވެއެވެ. ހުޅަނގު މޫސުމުގެ އަސަރު ގަދަވާން ފެށުމުން، ވައި ގަދަވެ ކަނޑުތައް ގަދަވާން ފަށާނެއެވެ. ޚާއްޞަކޮށް ވިލާގަނޑުގައި ވައި ވަރަށް ބާރުވާނެއެވެ.މި ދުވަސްވަރަކީ މޫސުން ކުއްލިއަކަށް ގޯސްވެދާނެ ދުވަސްވަރަކަށް ވާތީ، ކަނޑުދަތުރުފަތުރު ކުރާއިރު މޫސުމަށް ވަރަށް ބޮޑަށް ސަމާލުވާން ޖެހޭނެއެވެ.
